"İranın dünyadakı dostları barmaq sayı qədərdir. Belə bir vəziyyətdə Azərbaycan kimi mehriban qonşu və dost ölkə ilə münasibətləri gərginləşdirmək İranın strateji maraqlarına ziddir”.
Bu sözləri AZXEBER.COM-a açıqlamasında Milli Məclisin deputatı Elman Nəsirov deyib.
O bildirib ki, Azərbaycan heç vaxt öz ərazisinin İrana qarşı istifadə edilməsinə icazə verməyib:
"İran tərəfindən seçilən hədəflər mülki obyektlər olub. Diqqət çəkən məqam ondan ibarətdir ki, İran İslam İnqilabı Keşikçiləri Korpusu (SEPAH) öz rəsmi səhifəsində bu hadisəni Azərbaycana ‘xəbərdarlıq’ kimi təqdim edib. Bəs bu xəbərdarlıq nə üçündür? Hansı səbəbə və motivə əsaslanır? Bu barədə heç bir aydın məlumat verilməyib.
Hazırda İran ABŞ və İsraillə qarşıdurma vəziyyətindədir. İran tərəfi daha əvvəl bəyan etmişdi ki, ABŞ hərbi bazalarının yerləşdiyi və ya öz ərazisindən onlara qarşı istifadə olunmasına icazə verən ölkələr rəsmi Tehran üçün legitim hədəf hesab ediləcək. Bu mövqe hamıya bəllidir.
Lakin Azərbaycan indiyədək bir dəfə də olsun öz ərazisinin İrana qarşı istifadə edilməsinə icazə verməyib. Bu məsələ ilə bağlı Azərbaycanın qəti, dəyişməz və prinsipial mövqeyi var. Bu mövqe 2006-cı ildə Prezident İlham Əliyev ABŞ-yə rəsmi səfəri zamanı da açıq şəkildə bəyan edilmişdi və həmin siyasət bu günə qədər davam etdirilir”.
Deputat qeyd edib ki, Azərbaycan heç vaxt İrana qarşı tətbiq olunan sanksiyalara qoşulmayıb:
"Azərbaycan heç vaxt İrana qarşı tətbiq edilən sanksiyalara qoşulmayıb. Əksinə, İranla mehriban qonşuluq münasibətlərini qorumağa çalışıb. Buna baxmayaraq, əvvəllər İranda Azərbaycanın səfirliyinə silahlı hücum baş verdi, nəticədə bir diplomatımız həlak oldu, biri isə yaralandı.
Bundan əvvəl İran–İsrail–ABŞ qarşıdurmasında da Azərbaycan İrana qarşı hər hansı düşmən mövqeyi tutmayıb. Əksinə, münaqişələrin tezliklə diplomatik yollarla həll olunmasını dəstəkləyib. Bununla belə, İran mediasında Azərbaycana qarşı təbliğat və ittihamların şahidi olmuşuq”.
Parlamentari əlavə edib ki, İranın bu addımı qəbuledilməzdir:
"Hazırkı hadisə də anlaşılmaz və qəbuledilməzdir. Azərbaycan Prezidenti iki gün əvvəl İran səfirliyinə gedərək Ali dini lider Əli Xameneinin vəfatı ilə bağlı başsağlığı verib. Dünyanın heç bir yerində ölkə başçısı ölkəsində fəaliyyət göstərən səfirliyə gedərək bu cür başsağlığı verməyib. Bu, Azərbaycanın xoş niyyətinin göstəricisi idi.
Bundan əlavə, İranın xarici işlər nazirinin müavini Azərbaycandan Livandan İran vətəndaşlarının təxliyəsi üçün kömək istəmişdi. Azərbaycan bu xahişi də yerinə yetirib, hətta onların təyyarə və digər xərclərini belə qarşılayıb. Bu addım dostluq və çətin günlərdə bir-birinə dəstək prinsipi ilə atılmışdı.
Bütün bunların fonunda Azərbaycanın mülki obyektlərinə zərbə endirilməsi qəbuledilməzdir. Bu, xəyanət, nankorluq və dostluq münasibətlərinə zidd addım kimi qiymətləndirilir”.
E. Nəsirov bildirib ki, hadisə ilə bağlı aydın izahın verilməməsi İran daxilində koordinasiya probleminin olduğunu göstərir:
"İran tərəfi baş verən hadisəni tam şəkildə izah edə bilmir. İranın Xarici İşlər Nazirliyi belə bir hücumdan xəbərsiz olduğunu bildirir. Lakin SEPAH bunu ‘xəbərdarlıq’ adlandırır. Bu isə İran daxilində müxtəlif qurumlar arasında koordinasiya probleminin olduğunu göstərir. Görünən odur ki, SEPAH bir çox məsələlərdə həlledici rol oynayır. Özünü böyük dövlət ənənələrinə malik ölkə kimi təqdim edən bir dövlətin belə düşünülməmiş addım atması isə ciddi suallar doğurur”.
Şahanə Ziyad
