Azərbaycanda bağlanan universitetlər: Tələbələrin aqibəti necə olub?

Qərardan sonra universitetin gələcək fəaliyyəti və burada təhsil alan tələbələrin taleyi sosial şəbəkələrdə geniş müzakirə olunur.

Xatırladaq ki, Azərbaycanda müxtəlif dövrlərdə bir sıra ali təhsil müəssisələrinin fəaliyyəti dayandırılıb.

AZXEBER.COM bağlanan universitetlərin tələbələrinin təhsillərini necə davam etdirdiyini araşdırıb.

1991-ci ildə fəaliyyətə başlayan Bakı İslam Universiteti ölkədə ali dini təhsil verən əsas ali təhsil müəssisələrindən biri idi. 2018-ci ildə Azərbaycan İlahiyyat İnstitutunun yaradılmasından sonra universitetin fəaliyyəti dayandırılıb. Birinci kurs tələbələri digər ali təhsil müəssisələrinə köçürülüb.

1993-cü ildə yaradılan Qafqaz Universiteti uzun illər Azərbaycanın ən nüfuzlu özəl ali təhsil müəssisələrindən biri hesab olunurdu. 2016-cı ildə universitetin təsisçisi fəaliyyətin dayandırılması barədə qərar qəbul edib və ali məktəb bağlanıb. Həmin dövrdə universitetin bağlanması Türkiyədə baş verən hadisələr fonunda da geniş müzakirə olunurdu. Hazırda universitetin yerləşdiyi binada Bakı Mühəndislik Universiteti fəaliyyət göstərir.

1996-cı ildə fəaliyyətə başlayan Müstəqil Azərbaycan Universiteti bir vaxtlar ölkənin tanınmış özəl ali məktəblərindən biri olub. Lakin 2004-cü ildə aparılan yoxlamalar zamanı ali məktəbin Dövlət Tələbə Qəbulu Komissiyasının icazəsi olmadan tələbə qəbul etdiyi və lisenziya şərtlərini pozduğu müəyyən edilib. Nəticədə 2006-cı ildə universitetin lisenziyası ləğv olunub. Universitet bağlandıqdan sonra tələbələr digər ali təhsil müəssisələrinə köçürülüb. Qərar uzun müddət məhkəmə çəkişmələri və tələbələrin keçirdiyi aclıq aksiyaları ilə müşayiət olunub.

1995-ci ildə fəaliyyətə başlayan Bakıda Amerika Universitetinin fəaliyyəti 2000-ci ildə dayandırılıb. Təsisçilərin müraciəti əsasında universitetin dövlət qeydiyyatı və lisenziyası ləğv edilib. Həmin dövrdə aparılan yoxlamalar nəticəsində müxtəlif özəl ali məktəblərin 18 filialının fəaliyyəti dayandırılıb. Bundan başqa, xarici universitetlərin Azərbaycanda qanunsuz yaradılmış 16 filialı və tədris məntəqəsi də məhkəmə qərarı ilə bağlanıb.

1995-ci ildə fəaliyyətə başlayan Bakı Asiya Universiteti 2015-ci ildə Elmi Şuranın qərarı ilə fəaliyyətini müvəqqəti dayandırıb. Həmin vaxt universitetdə təhsil alan 270 tələbə digər ali təhsil müəssisələrinə köçürülüb. Sonradan fəaliyyəti bərpa olunmayan universitet 2025-ci ildə hüquqi şəxs kimi də rəsmi qaydada ləğv edilib.

Bir vaxtlar minlərlə tələbənin təhsil aldığı Azərbaycan Beynəlxalq Universiteti 1997-ci ildə fəaliyyətə başlayıb. Lakin 2010-cu ildə universitetin lisenziyası uzadılmayıb. Nazirliyin yoxlamaları zamanı tədris prosesində ciddi nöqsanlar, normativ sənədlərin pozulması, maddi-texniki bazanın standartlara cavab verməməsi, elmi dərəcəsi olmayan müəllimlərin dərs deməsi, qanunsuz köçürmələr və sənədlərin saxtalaşdırılması halları aşkarlanıb. Bundan sonra universitet fəaliyyətini tam dayandırıb, tələbələr isə digər ali təhsil müəssisələrinə köçürülüb.

Naxçıvanda fəaliyyət göstərən yeganə özəl ali təhsil müəssisələrindən biri olan "Naxçıvan" Universiteti 2024-cü ildə bağlanıb. Təsisçinin müraciətindən sonra universitetin fəaliyyəti dayandırılıb. Son kurs tələbələri məzun olub, aşağı kurslarda təhsil alan tələbələr isə digər universitetlərə köçürülüb.

1997-ci ildə yaradılan Azərbaycan İctimai-Siyasi Universitetinin fəaliyyəti 2014-cü ildə dayandırılıb. Təhsil Nazirliyinin apardığı yoxlamalar zamanı tədrisin formal xarakter daşıdığı, kafedraların və professor-müəllim heyətinin normativ tələblərə cavab vermədiyi, maddi-texniki bazanın isə standartlara uyğun olmadığı müəyyən edilib. Bu səbəbdən universitetin lisenziyası uzadılmayıb.

Mingəçevirdə fəaliyyət göstərən "San Marino" Universiteti Azərbaycanın ən qalmaqallı özəl ali təhsil müəssisələrindən biri kimi yadda qalıb. Araşdırmalar zamanı qanunsuz tələbə qəbulu, saxta diplomların verilməsi və tədris prosesində ciddi pozuntular aşkarlanıb. Nəticədə 2001-ci ildə universitetin, eləcə də Göyçay və Bərdə filiallarının fəaliyyəti dayandırılıb.