Son illərdə ölkədə bayram günlərinin çox olması ilə bağlı müzakirələr yenidən aktuallaşıb. İctimaiyyət arasında bu vəziyyətin iqtisadi proseslərə, işgüzar fəallığa və ümumi məhsuldarlığa necə təsir etdiyi barədə müxtəlif fikirlər səsləndirilir. Bəzi ekspertlər bayram günlərinin çox olmasının iş prosesində fasilələr yarada biləcəyini qeyd etsələr də, digər yanaşmalara görə, bu dövrlər iqtisadiyyatın müəyyən sahələrində, xüsusilə xidmət və turizm sektorunda əlavə aktivlik və dövriyyə artımı ilə müşahidə olunur.
İqtisadçı Xalid Kərimli AZXEBER.COM-a bildirib ki:
"Son zamanlar elə bir təsəvvür yaranır ki, ölkədə bayram günlərinin sayı artıb. Lakin əslində son 10 ildə vəziyyət ciddi şəkildə dəyişməyib. Sadəcə, 2020-ci ildə Qələbə Günü əlavə olunub. Yəni 8 Noyabr – Vətən müharibəsində qələbənin və işğaldan azad olunmuş ərazilərin qeyd olunması ilə bağlı yeni bayram təsis edilib. Bayram günlərinin iqtisadiyyata ciddi təsiri yoxdur. Çünki bu günlər əvvəlcədən planlaşdırılır, sahibkarlar və işəgötürənlər də bunu nəzərə alaraq fəaliyyətlərini tənzimləyə bilirlər”.
Ekspert bildirib ki, hazırkı dövrdə dünyada iş saatlarının azaldılması istiqamətində düşünülür:
"Hazırkı dövrdə dünyada iş saatlarının azaldılması istiqamətində düşünülür. Süni intellektin, avtomatlaşdırmanın və robot texnologiyalarının inkişafı nəticəsində insanların daha çox rutin işlərdən azad olunması hədəflənir. Məhsuldarlıq artıq insanların daha çox işlədilməsi hesabına deyil, texnologiyaların tətbiqi ilə artırılmalıdır”.
O vurğulayıb ki, bayram günlərinin iqtisadi təsiri daha çox regionlarda hiss olunur:
"Xüsusilə daxili turizm, hotelçilik, restoran və əyləncə sektoru bu dövrlərdə aktivlik qazanır. İnsanlar bölgələrə, kəndlərə və turizm mərkəzlərinə səfər edirlər ki, bu da həmin sahələrdə dövriyyəni artırır. Təbii ki, bu dövrlərdə qiymətlər də adətən 30-40 faiz yüksələ bilir. Digər tərəfdən, əmək qanunvericiliyinə görə, bayram günlərində işləyənlərə daha yüksək ödəniş tətbiq olunur. Bu isə özəl sektorun fəaliyyətini məhdudlaşdırmır. İşçilər istədikləri halda işləyə bilirlər, lakin qanunvericiliyə uyğun olaraq əlavə ödənişlə təmin olunmalıdırlar. Azərbaycanda əməkhaqqı səviyyəsinin nisbətən aşağı olduğunu nəzərə alsaq, bu cür əlavə ödənişlər ciddi problem yaratmamalıdır”.
