Azərbaycanın Misirdəki səfiri Şahin Abdullayev bu ölkənin investisiya naziri Osama Saleh, mülki aviasiya naziri Samir İmbabi, mədəniyyət nazirinin xarici mədəni əlaqələr üzrə müavini və tərcümələr üzrə milli mərkəzin direktoru xanım Kamila Sübhi, təhsil naziri Dr.Musafa Əl-Səid Musad ilə görüşlər keçirib.
Səfirlikdən daxil olan məlumata görə, görüşlərdə iqtisadi-ticarət, qarşılıqlı sərmayələrin və turist axınının təşviq olunması, birbaşa hava reyslərinin açılması üçün kommersiya imkanlarının öyrənilməsi məsələri müzakirə olunub. Həmçinin mədəniyyət və təhsil sahəsində əməkdaşlığın gücləndirilməsi, Misirin Azərbaycanda mədəniyyət günlərinin keçirilməsi və hökumətlərarası müştərək komissiyanın növbəti iclasının keçirilməsi, yüksək səviyyədə qarşılıqlı səfərlərin təşkil olunması kimi məsələlər də müzakirə mövzusu olub.
İki ölkə arasında dərin tarixi əlaqələrin olduğunu qeyd edən Misir rəsmiləri yeni hökumətin Azərbaycanla əlaqələri daha da gücləndirməyə maraqlı və əzmli olduğu bildiriblər.
Səfir Ş.Abdullayev Azərbaycanın siyasi, iqtisadi, sosial və digər sahələrdə əldə etdiyi uğurları, iqtisadi inkişaf göstəriciləri, qarşılıqlı faydalı əməkdaşlıq üçün potensial sahələr və bütün Cənubi Qafqaz regionunun inkişafına mane olan Ermənistan-Azərbaycan münaqişəsi haqqında məlumat verib.
//APA
