AZXEBER.COM xəbər verir ki, müraciətlərdə Ermənistan ordusunun bu ölkənin siyasi-hərbi rəhbərliyinin birbaşa göstərişi ilə Bərdə şəhərini "Smerç” sistemindən raket atəşinə tutması nəticəsində 4 nəfər mülki şəxsin, o cümlədən 7 yaşlı Aysunun qətlə yetirilməsi və 13 nəfər şəxsin ağır yaralanması pislənilir. Bildirilir ki, Ermənistanın ATƏT-in Minsk Qrupunun həmsədr ölkələrinin təşəbbüsü ilə razılaşdırılmış atəşkəsi ölkəmizin cəbhədən kənar yerləşən şəhərlərini raket atəşinə tutaraq, günahsız şəxsləri, o cümlədən uşaqları qətlə yetirməklə pozması ənənə halını almışdır.

 

Qeyd edilib ki, ilk iki atəşkəs razılaşmasının Ermənistan tərəfindən pozulması Gəncəyə ballistik raketlə vurulan zərbələr nəticəsində onlarla dinc insanın, o cümlədən qadın və uşaqların qətlə yetirilməsi və yaralanması ilə nəticələnmişdir. Bərdəyə hücumun isə bu sırada üçüncü belə atəşkəs pozulması olduğu diqqətə çatdırılmış, bu hücumların Ermənistan rəhbərliyinin çirkin və insanlıq qanunlarından uzaq mahiyyətini, bu dövlətin beynəlxalq razılaşmalara, beynəlxalq hüquqa etinasızlığını bir daha ortaya qoyduğu vurğulanmışdır.

 

Müraciətlərin sonunda dünya ictimaiyyəti Ermənistanı bu terror hərəkətlərinə görə qəti şəkildə pisləməyə, törətdiyi müharibə cinayətlərinə görə bu ölkəni məsuliyyətə cəlb etməyə, eləcə də bölgədə sülhün bərqərar edilməsi üçün BMT Təhlükəsizlik Şurasının qətnamələrinə uyğun olaraq Ermənistan silahlı qüvvələrinin Azərbaycanın bütün işğal olunmuş ərazilərindən çıxarılmasını tələb etməyə çağırılır.