Azərbaycanın əməkdar artisti, muğamlarımızın və xalq mahnılarımızın mahir ifaçısı Bəsti Sevdiyevaya Türkiyədə film və serial çəkən bır sıra şirkətdən dəvət gəlib.
Bu barədə tanınmış muğam ustasının mətbuat katibi Cəfər Mənsimi məlumat verib. Onun sözlərinə görə, tanınmış xanəndəyə həmin şirkətlərin istehsal etdiyi bir sıra serial və filmlərində rol almaq təklif olunub.
Mətbuat katibi xanəndənin təklifləri dəyərləndirib-dəyərləndirməmək haqqında düşündüyünü deyib.
“Gözləmədiyimiz bir anda, bizə bir sıra şirkətlərdən “Bəsti xanımı istehsal etdiyimiz serial və filmlərin birində ana rolunda görmək istəyirik” deyə müraciət daxil oldu. Maraqlısı odur ki, bizə bir şirkətdən yox, bir neçə şirkətdən eyni zamanda təklif gəlib. Bu təklifləri Bəsti xanımın aktiv fəaliyyətinin nəticəsi kimi qiymətləndirirəm. Görünür, xanəndənin fəaliyyəti film çəkən şirkətlərin gözündən yayınmayıb. Şirkətlərin adını hələ ki, açıqlamaq istəmirik. Amma yalnız onu qeyd edə bilərəm ki, həmin şirkətlər bu günə kimi Türkiyənin bir sıra məşhur serial və filmlərinin istehsalçısı olublar. Hazırda biz həmin şirkətlərlə danışıqlar aparırıq. Hər halda hansı şirkətin təklifi daha yaxşı olarsa, onu dəyərləndirməyə çalışacayıq”.
Qeyd edək ki, Bəsti Sevdiyeva Dövlət Mədəniyyət və İncəsənət Universitetinin musiqili komediya teatrı aktyoru fakültəsini bitirb. Bu günə kimi bir sıra teatr tamaşalarında müxtəlif obrazlar canlandırıb.
Maraqlı məqam odur ki, Bəsti Sevdiyeva ilə yanaşı onun mətbuat katibinə də film və ya serialların birində rol almaq təklifi olunub. Bu təklifə münasibət bildirən Cəfər Mənsimi ANS PRESS-ə açıqlıamasında “Mən hazırda təhsil alıram. Əgər bu təklifi dəyərləndirərəmsə, təhsilimi dayandırmaq məcburiyyətində olacam. Mənim üçün təhsil daha önəmlidir. Ona görə hələ təhsil alıb, daha sonra bu işlər barəsində düşünə bilərəm” deyə qeyd edib.
