AZXEBER.COM-un verdiyi məlumata görə, bir çox “Bakcell” abunəçiləri “Əla CİN” tarifinə keçdikdən sonra müəyyən problemlərlə qarşılaşdığını bildirib.
Belə ki, onlar telefon zənglərinin bir çox hallarda qeyri-müəyyən şəkildə qırılmasından şikayət edir. Maraqlı məqam isə budur ki, belə hallar qısa zənglər zamanı yox, daha uzun müddət – 15-20 dəqiqə danışdıqdan sonra baş verir. Beləliklə, 7 qəpik müqabilində 1 saat danışmaq istəyən abunəçi, bu qırılmalar ucbatından daha çox xərcə düşməli olur.
Bu arada sözügedən tarif haqda qısa məlumat vermək yerinə düşər. Bildiyimiz kimi, “Əla CİN” tarifinə əsasən, “Bakcell” abunəçiləri şəbəkədaxili zənglərin 1 saatına görə cəmi 7 qəpik ödəyirlər. Zəng intervalı isə 1 saatdır. Yəni, istifadəçi başqa bir “cin” nömrə ilə telefon bağlantısı qurduqda 1 saniyə, 1 dəqiqə və ya 1 saat danışmasından asılı olmayaraq balansından 0.07 AZN çıxılır. 1 saatın tamamında isə zəng avtomatik olaraq dayandırılır. Beləliklə, “Əla CİN” tarifindən istifadə etdikdə, qısa müddətli zənglər “Bakcell”ə, uzun zənglər isə istifadəçiyə sərf edir.
Məsələ ilə bağlı “Bakcell”in müştəri xidmətlərinə müraciət etdikdə maraqlı cavab aldıq: Zənglər şəbəkədəki problemlərə görə qırılır. Başqa vaxt şəbəkə probleminin olduğunu hər fürsətdə inkar edən şirkət üzvlərinin indi belə açıqlama verməsini özünüz dəyərləndirin.
“Əla CİN” tarifi ilə bağlı daha bir məqamı xatırladaq. İlk vaxtlar bu tariflə edilən zənglər 10 saniyəyə qədər davam etdikdə balansdan 2 qəpik, 10 saniyədən 1 saata qədər olduqda isə 7 qəpik çıxılırdı. Lakin sonradan bu qayda ləğv olundu və zəngin dəyəri müddətindən asılı olmayaraq 7 qəpik oldu (təbii ki, 1 saatdan çox olmamaqla). Bir çox “Bakcell” istifadəçiləri bu dəyişiklik haqda onlara məlumat verilməməsi səbəbindən anlaşmazlıqla qarşılaşıb.
Qeyd edək ki, məsələ araşdırılarkən “Bakcell” abunəçilərinin rəyindən istifadə edilib. AZXEBER.COM olaraq qarşı tərəfin də fikrini yayımlamağa hazırıq.
