Bakı avtovağzalında qiymətlərin süni şəkildə qaldırılması problemini bundan əvvəl də dəfələrlə qabartmışıq.
Lakin məlum olur ki, problem hələ də həll olunmayıb.
AZXEBER.COM-un məlumatına görə, bu barədəDay.Azsaytına oxuculardan biri məlumat verib. Oxucunun göndərdiyi məktubda belə deyilir: "Bakı-Xudat və Bakı-Xaçmaz istiqamətində hərəkət edən avtobuslarda həyasızcasına gediş haqqını qaldırırlar. Bakıdan Xaçmaza gediş haqqı 2,5 manat olduğu halda, sərnişinlərdən 4 manat tələb edirlər. Əlində bilet avtobusa daxil olan insanları isə avtobusdan çıxarırlar və deyirlər ki, get kim səni biletlə apararsa, onun avtobusuna min". Məsələyə aydınlıq gətirmək üçün saytın əməkdaşı Bakı Beynəlxalq Avtovağzalının növbə rəisiMəhəmməd Abdullayevlə əlaqə saxlayıb. O bildirib ki, avtovağzalda bir neçə kassa var və orada bilet satırlar. "Sürücünün ixtiyarı yoxdur ki, sərnişindən əlavə vəsait tələb etsin. Əgər belə bir fakt varsa, biz məsələni araşdırmağa hazırıq. Qoyun həmin oxucu yazılı şəkildə avtovağzal rəhbərliyinə müraciət etsin və biz araşdırma aparacağıq", - o əlavə edib.
