Sabah – iyulun 16-dan etibarən Bakının Əbdüləzəl Dəmirçizadə küçəsində nəqliyyat vasitələrinin hərəkət istiqaməti əksinə dəyişdiriləcək.
AZXEBER.COM xəbər verir ki, dəyişiklik Nəqliyyatı Əlaqələndirmə Şurasının təsdiqlədiyi layihə çərçivəsində həyata keçirilir. Layihə daha əvvəl Koroğlu Rəhimov küçəsi və Xətai prospektində uğurla tətbiq edilən nəqliyyat həllərinin davamıdır.
Yeni hərəkət sxeminə əsasən, Təbriz küçəsindən Heydər Əliyev prospekti istiqamətində hərəkət edən nəqliyyat vasitələri əvvəlki marşrutdan fərqli olaraq yalnız Koroğlu Rəhimov və Əhməd bəy Ağaoğlu küçələri vasitəsilə hərəkətlərini davam etdirə biləcəklər.
Dəyişiklik nəticəsində Xətai prospekti ilə Əbdüləzəl Dəmirçizadə küçəsinin kəsişməsində işıqforun fazalarının sayı 3-dən 2-yə endiriləcək. Bunun sayəsində nəqliyyat vasitələrinin orta gözləmə müddətinin təxminən 40 saniyəyədək azalacağı, kəsişmənin ötürücülük qabiliyyətinin isə artacağı bildirilir.
Qeyd olunur ki, layihə əsasən Koroğlu Rəhimov küçəsi, Xətai prospekti, eləcə də Yusif Səfərov küçəsi və Heydər Əliyev prospektində hərəkət şəraitinin yaxşılaşmasına müsbət təsir göstərəcək.
Layihə çərçivəsində yeni avtobus zolağı da təşkil ediləcək. Bu zolaq ümumi nəqliyyat axınına mane olmadan yalnız sağa – Elm və Təhsil Nazirliyi istiqamətində avtobusların hərəkətini təmin edəcək.
Bildirilib ki, dəyişikliklərə baxmayaraq, Əbdüləzəl Dəmirçizadə küçəsində mövcud parklanma yerləri tam şəkildə saxlanılacaq.
Qeyd edək ki, bu dəyişiklik "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” çərçivəsində Ağaoğlu və Yusif Səfərov küçələrini birləşdirəcək tunelin tikintisi başa çatana qədər tətbiq olunacaq müvəqqəti həll hesab olunur.
