Bu gün saat 12:00 radələrində bir qrup gənc İranın Bakıdakı səfirliyinin qarşısında aksiya keçirib. AZXEBER.COM-un məlumatına görə, aksiya iştirakçıları İçərişəhər metrostansiyasının qarşısından İranın Bakıdakı səfirliyinin binasına doğru yürüş ediblər.
Gənclər aksiyanın qətnaməsini oxuyaraq, qətnamənin sürətini səfirliyə təqdim etmək istəyiblər. Lakin səfirlikdən qətnaməni qəbul edən olmayıb və qətnamə səfirliyin poçt qutusuna atılıb.Polis aksiyanın qarşısını alıb.
Gənclərin nümayəndəsi Asim Kazımlı ANS PRESS-ə açıqlamasında bildirib ki, aksiyanın keçirilməsində məqsəd Cənubi Azərbaycanda Urmiya gölünün qurudulmasına etiraz etmək və cənubi azərbaycanlılara dəstək olmaq olub. Belə ki, İranda azərbaycanlıların yaşadığı II böyük şəhər Urmiyadır. Urmiya şəhərinə 30 km yaxınlıqda dünyanın II böyük duz gölü olan Urmiya gölü yerləşir. Son 10 ildə Urmiya gölünün 80 faizi quruyub. Göl hazırda sürətli şəkildə qurumaqda davam edir."Cənubi Azərbaycanın ən böyük gölü olan bu göl dünyanın ikinci duzlu gölü kimi YUNESCO-da təbii xəzinə kimi tanınır. Yuxarıda bildirdiyimiz kimi Urmiya gölü son illərdə aparılan məqsədyönlü siyasət nəticəsində quruma təhlükəsilə qarşı-qarşıya qalıb. Belə ki, əkinə yararlı torpaqların suvarılması üçün gölə axan təbii çayların istiqamətinin dəyişdirilməsi, çaylar üzərində xeyli sayda su bəndlərinin tikilməsi, gölün üzərindən Təbrizlə Urmiyanı birləşdirən körpünün çəkilməsi və s. nəticəsində hazırda göldə suyun səviyyəsi 7 mert aşağı düşüb. Bu göstərici isə kritik normadan 2 metr aşağıdır. Eyni zamanda Urmiya gölünün 150 hektarı artıq duz səhrasına çevrilib. Hətta mütəxəssislər də ciddi tədbirlər görülməyəcəyi təqdirdə gölün 6-7 il ərzində yer üzündən silinəcəyi barədə xəbərdarlıq edirlər. Bu da ərazinin tamamilə səhraya çevrilməsinə və müxtəlif problemlərin yaranmasına gətirib çıxaracaq”, deyə gənclərin yaydığı bəyanatda bildirilir.Bəyanatda qeyd olunur ki, "102 adası olan Urmiya gölü flaminqo və ağ pelikan kimi bir çox quşların yaylağı olmaqla bərabər, dünyanın nadir və qiymətli su canlılarından olan artemianın yaşayış məskənidir. Ekoloji qeydiyyata görə, Urmiya gölündə 546 növ bitki mövcuddur. Hazırda göldə yaşanan bu böhranlı vəziyyət artmianın, bir çox quşların sayının azalmasına səbəb olub və onların nəslinin kəsilməsi təhlükəsini artırıb. Urmiya gölünün suyunun çəkilməsi duzlaqların ortaya çıxmasına səbəb olub. Küləklər vasitəsilə ətrafa yayılan duzlar həm insanların səhhətinə ciddi mənfi təsir göstərir, həm də əkin sahələrini yararsız hala salır. Bununla da Cənubi Azərbaycandakı münbit ərazilərin ekoloji tarazlığı pozulur. Bu problemlə əlaqədar bir çox rəsmi və qeyri-rəsmi müraciətlərə baxmayaraq, İran rejimi gölün məqsədyönlü sürətdə qurudulmasında israrlı görünür".Qeyd edək ki, cənubi azərbaycanlılar bir neçə ildir ki, gölün qurumasına etiraz olaraq aksiyalar keçirirlər. Son günlər belə aksiyalar intensivləşib.
