Bakı Dövlət Universitetində Azərbaycan ədəbiyyatının görkəmli nümayəndəsi, böyük şair və dramaturq Hüseyn Cavidin anadan olmasının 130 illik yubileyinə həsr olunmuş Respublika elmi konfransı keçirilib.
BDU-dan AZXEBER.COM-a verilən məlumata görə, konfransı giriş sözü ilə açan rektor, akademik Abel Məhərrəmov böyük şairin həyat və yaradıcılığından, ədəbiyyata, cəmiyyətə verdiyi töhfələrdən danışıb: «Ümummilli lider Heydər Əliyevin böyük mütəfəkkir haqqında dediyi “Hüseyn Cavid Azərbaycan xalqını, onun mədəniyyətini, ədəbiyyatını, elmini yüksəklərə qaldıran böyük şəxsiyyətlərdən biridir. Hüseyn Cavidin yaratdığı əsərlər Azərbaycan xalqının milli sərvətidir. Onlar bu gün üçün, gələcək nəsillər üçün dərs kitabıdır», sözlərini xatırladan rektor ulu öndərimizin dahi Cavidin xatirəsinin əbədiləşdirilməsindəki xidmətlərində də danışıb.
Daha sonra Filologiya fakültəsinin dekanı, dosent Məhərrəm Vəliyev məruzə ilə çıxış edərək Hüseyn Cavidin yaradıcılığının əsas ideya istiqamətindən, müasir cəmiyyətdəki rolu və əhəmiyyətindən danışıb. Daha sonra professorlar Qara Namazov və Tofiq Hacıyev çıxış ediblər. Natiqlərin çıxışlarından sonra filologiya fakültəsinin tələbələri mütəfəkkir şair, gözəl dramaturq və böyük filosofun əsərlərindən ibarət səhnəcikləri nümayiş etdiriblər.
