Zaman-zaman bəzi dairələr tərəfindən Azərbaycan əleyhinə qərəzli qətnamələr qəbul olunub. Bu kimi addımlardan növbətisi isə Belçika və Niderlandın Nümayəndələr Palataları tərəfindən atılıb. Belçika və Niderlandın Nümayəndələr Palataları 2026-cı il aprelin 16-da Azərbaycan-Ermənistan sülh prosesinə, hər iki ölkənin birgə səyləri ilə regionda sülh və əməkdaşlıq mühitinin formalaşmasına yönəlmiş addımlara zərbə vurmaq məqsədi daşıyan qətnamələr qəbul edib.
Belçika və Niderlandın Nümayəndələr Palatalarının 16 aprel 2026-cı ildə qəbul etdiyi qətnamələrə Azərbaycan Milli Məclisi sərt reaksiya verib.
Qurum bu sənədlərin qərəzli və əsassız olduğunu bildirərək, onların Azərbaycan-Ermənistan sülh prosesinə zərbə vurduğunu qeyd edib. Həmçinin Belçika və Niderlandla parlamentlərarası əlaqələrin ləğvi təklif olunub.
Milli Məclisin deputatı Naqif Həmzəyev AZXEBER.COM-a açıqlamasında deyib ki, Belçika, Fransa, Niderland kimi ölkələrdə güclü erməni diasporası mövcuddur:
"Avropa Parlamentlərinin bu cür qərarlar qəbul etməsinin arxasında fərqli amillər dayanır. İlk olaraq burada erməni diasporunun fəaliyyətini qeyd etməliyik. Belçika, Fransa, Niderland kimi ölkələrdə güclü erməni diasporası mövcuddur. Bu diaspora onilliklər ərzində siyasi əlaqələr qurub, maliyyə resursları ayırıb və parlamentlərdə öz maraqlarını təmsil edəcək siyasətçiləri formalaşdırıb. Bu, dünya siyasətinin normal bir reallığıdır”.
Parlamentari qeyd edib ki, burada Avropa daxilindəki struktur maraqları da rol oynayır:
"Azərbaycanın Rusiya və İranla sərhəddə müstəqil xarici siyasət yürütməsi, Brüsselin bütün tərəflərə tətbiq etmək istədiyi "dəyərlər çərçivəsi"nə sığmır. Buna görə müəyyən Avropa institutları Azərbaycanı "itaətsiz" tərəf kimi göstərməyə meyillidirlər. Azərbaycanın güclü tərəf kimi görsənməsini və öz reallıqlarını yarada bilməsini həzm edə bilmirlər. Avropa ölkələri həm Azərbaycandan qaz alır, həm də bu cür qərarlar qəbul edir. Bu, ikili standartların açıq ifadəsidir”.
Deputat deyib ki, bəzi dairələr tarixə qovuşan bir məsələni yenidən diriltməyə çalışılır:
"Bəzi dairələr tarixə qovuşan bir məsələni yenidən diriltməyə çalışılır. Qarabağ məsələsi Azərbaycanın öz ərazilərini bərpa etməsi ilə hüquqi-siyasi baxımdan həll olunmuşdur. Bu, beynəlxalq hüququn tanıdığı suveren çərçivə daxilindəki bir faktdır. Lakin bu faktın müəyyən dairələr tərəfindən qəbul edilməməsi, onun süni şəkildə "açıq məsələ" kimi saxlanılması cəhdi ciddi siyasi manipulyasiyanın göstəricisidir”.
Şahanə Ziyad
