Almaniyanın paytaxtında 62-ci beynəlxalq Berlin film festivalı öz işinə başlayır. Fevralın 19-dək davam edəcək "Berlinale" festivalı dünya kino sənayesində böyük mədəni hadisədir. Kann və Venesiya kinofestivalları ilə yanaşı, Berlin film festivalı da kino dünyasında ən böyük və mötəbər festivallardan hesab edilir. "Berlinale"də, adətən, 400-ə yaxın filmin, əsasən də beynəlxalq və Avropa filmlərinin premyerası baş tutur. "Berlinale Palast" adlı sarayda keçirilən festivala 300 minə yaxın bilet satılır.Qeyd edək ki, Berlin film festivalının əsasını ikinci dünya müharibəsində müttəfiq olan ABŞ, Böyük Britaniya və Fransa qoyub. İlk festival 1951-ci il iyunun 6-dan 18-ə kimi keçirilib. "Berlinale"də müəllif filmləri üstünlük təşkil edir. Festivalın müsabiqə proqramında festivalın başlamasından əvvəlki 12 ay ərzində istehsal edilmiş və heç bir festivalda nümayiş edilməmiş bədii tammetrajlı və qısametrajlı filmlər iştirak edir.Festivalın əsas mükafatı "Qızıl Ayı"dır. Ayı Berlin şəhərinin simvoludur. Bu mükafata festival çərçivəsində əsas müsabiqənin ən yaxşı filmi, 2007-ci ildən isə həmçinin ən yaxşı qısametrajlı filmi layiq görülür. "Gümüş Ayı" mükafatını isə münsiflər heyətinin qran-pri nominasiyalarının qalibləri alır. Onlar "ən yaxşı rejissor", "ən yaxşı aktyor", "ən yaxşı aktrisa", "ən yaxşı ssenari" nominasiyalarında verilir."Berlinale" kinofestivalında həmçinin "Alfred Bauer mükafatı" da var ki, bu da "kino incəsənətində yeni yolun açılmasında" seçilən filmlərə verilir. 1987-ci ildən etibarən festival çərçivəsində "cinsi azlıqlar haqqında ən yaxşı filmə" və tamaşaçı rəğbətinə görə "Teddi" adlı xüsusi mükafat da təqdim edilir.
