Ölkədə bəzi malların idxalı gömrük rüsumundan azad ediləcək. Bununla bağlı yaxın günlərdə Milli məclisdə yeni Gömrük tarifi haqqında qanun layihəsinin qəbulu gözlənilir. Layihədə qeyd olunur ki, gömrük rüsumlarından müəyyən yükləri, eyni zamanda dənizdə balıq ovlayan Azərbaycan gəmilərini və Azərbaycanın hüquqi və fiziki şəxsləri tərəfindən icarəyə götürülmüş gəmilərin fəaliyyətini təmin etmək məqsədi ilə gömrük ərazisindən çıxarılan maddi-texniki təchizat, tədarük malları, yanacaq, ərzaq, dərman və digər məhsullar gömrük rüsumundan azad edilir. Millət vəkili Vahid Əhmədov isə deyir ki, burda əsas məqsəd malları rüsumlardan azad etmək, eləcə də inhisarçılığın, monopoliyanın qarşısın almaqla bağlıdır.Mütəxəssislər isə hesab edirlər ki, daxili bazarı qorumaq, ixracatı artırmaq üçün ölkədə rəqabət qabiliyyətli məhsullar istehsal edilməlidir. Əks təqdirdə nə daxili bazarın qorunmasında, nə ixracatda ciddi nailiyyətlər əldə etmək mümkün deyil.
