Dəniz mövsümünün başlaması ilə hər il istirahət üçün sahillərə üz tutan insanların sayı artır.
Yay aylarının gətirdiyi sevincin kölgəsində isə acı hadisələr də yaşanır. Dənizdə baş verən boğulma hallarında bəzən ən böyük çətinlik yalnız insanın xilas edilməsi deyil, itkin düşən şəxsin cansız bədəninin tapılması olur.
Bəzi hallarda axtarışlar saatlarla, günlərlə, hətta daha uzun müddət davam edir.
Bəs suda qalan insan bədənində zamanla hansı dəyişikliklər baş verir və cansız bədənin suyun üzərinə çıxması hansı amillərdən asılıdır?
AZXEBER.COM xəbər verir ki, insan öldükdən sonra orqanizmdə həyat fəaliyyəti dayansa da, hüceyrə və toxumalarda parçalanma prosesi müəyyən müddət davam edir.
İlk mərhələdə bədənin temperaturu aşağı düşməyə başlayır. Su havadan daha yüksək istilik keçiriciliyinə malik olduğu üçün suda qalan bədən daha sürətlə soyuyur. Soyuq su eyni zamanda çürümə prosesini ləngidə bilər. Orqanizmdəki bakteriyalar toxumaların parçalanmasını davam etdirir və bu zaman müxtəlif qazlar yaranır. Qazların toplanması nəticəsində qarın boşluğu, sinə nahiyəsi və digər hissələrdə şişkinlik əmələ gələ bilər. İsti sularda isə bakteriyaların fəaliyyəti daha intensiv olduğundan bu proses daha sürətli gedir.
Məhz bu şişkinlik bədənin sıxlığını dəyişərək onun suyun üzərinə qalxmasına səbəb ola bilər. Lakin bunun nə vaxt baş verəcəyini əvvəlcədən dəqiq müəyyən etmək mümkün deyil. Çünki hər hadisədə suyun temperaturu, dərinliyi və digər şərait fərqli olur.
Soyuq suda qazların yaranması və çürümə prosesi daha yavaş getdiyi üçün cansız bədən uzun müddət suyun altında qala bilər.
Bununla yanaşı, bədənin suyun altında qalmasına təkcə bu amillər təsir etmir. Bədənin geyimli və ya geyimsiz olması, suyun duzluluğu, axınlar və dib relyefi də mühüm rol oynayır.
Boğulma zamanı ağciyərlərə su daxil olması və bədəndəki havanın azalması ilk mərhələdə bədənin suyun üzərinə çıxmasına mane ola bilər. Bundan əlavə, cansız bədən suyun dibindəki daşlara, qayalara, su bitkilərinə və digər maneələrə ilişə bilər.
Dənizdə axtarışların çətinləşməsinin əsas səbəblərindən biri də su axınlarıdır. Axınlar cansız bədəni hadisənin baş verdiyi ərazidən xeyli uzağa apara bilər. Buna görə də meyitin tapıldığı yer həmişə hadisənin baş verdiyi nöqtə ilə üst-üstə düşmür.
Fəridə Əsədzadə
