Xəbər verdiyimiz kimi, bu gün bir qrup incəsənət xadiminə Azərbaycan Prezidentinin mükafatları verilib.
Prezident İlham Əliyev bununla bağlı Sərəncam imzalayıb.
Mükafata layiq görülənlər arasında adı olan Akademik Musiqili Teatrın aktyoru, Əməkdar artist Əkbər Əlizadə xəbəri alan zaman yaşadığı hissləri AZXEBER.COM-la bölüşüb:
"Hamımıza bəllidir ki, zamanında Ümummilli Liderimiz Heydər Əliyev hər zaman incəsənət xadimlərinə xüsusi diqqət və qayğı göstərib. Bu ənənəni dövlət başçımız İlham Əliyev uğurla davam etdirir.
Bu gün Prezidentimizin mükafatına növbəti dəfə layiq görüldüyüm üçün xoşbəxtəm. İncəsənət xadimi olaraq bu mükafat mənə böyük stimul və yaradıcılıq uğurlarımın artmasına ən böyük səbəbdir.
Əkbər Əlizadə deyib ki, ona xeyli təbrik gəlib:
"Bayaqdan telefonun susmur. Gələn zənglər, göndərilən təbrik mesajları ondan xəbər verir ki, bu mənim tamaşaçılarımın, mənə pərəstiş edənlərin də sevincinə tuş gəlib.
Yeri gəlmişkən bu məqamda vurğulayım ki, mədəniyyət nazirim Adil Kərimlinin də teatrlara olan diqqəti xüsusi münasibəti bizim daha da əzmlə çalışmağımıza zəmin yaradıb. Mənim teatr və səhnə fəaliyyətimi qiymətləndirib, mükafata layiq gördüyü üçün Prezidentimə sonsuz təşəkkürümü və minnətdarlığlmı bildirirəm. Teatrımızın direktoru Aqil müəllimin rəhbərliyi ilə tamaşaçılarımızın yolunu oynadığım tamaşalarımda gözləyirəm!".
Aysel Hacızadə
