Cəbrayıl şəhərində ilkin mərhələdə 4-5 mərtəbədən ibarət ikikorpuslu bina kompleksinin tikintisi planlaşdırılır və binalar körpü vasitəsilə əlaqələndiriləcək.
AZXEBER.COM report-a istinadən xəbər verir ki, bu barədə bu gün şəhərə təşkil olunmuş mediaturda bildirilib.
Xatırladaq ki, Prezident İlham Əliyev sentyabrın 28-də Cəbrayılda olub, burada inzibati binanın təməlini qoyub. Şəhərin Baş planına əsasən, inzibati bina işgüzar zona kimi müəyyən olunmuş bir hektara yaxın ərazidə tikiləcək. Layihəyə əsasən, ərazidə dörd bina inşa ediləcək. Hər bina müasir üslubda layihələndirilib.
4-5 mərtəbəli binalarla yanaşı, ikinci mərhələdə 3-4 mərtəbəli binaların tikintisi də nəzərdə tutulur. Binaların fasadında müasirlik və milliliyin ahəngi əsas götürülüb. Belə ki, eyvanlarda milli elementimiz olan şəbəkədən istifadə olunacaq.
Layihəyə əsasən, inzibati bina kompleksinin həyətində sakinlərin istirahəti üçün park salınacaq. Buradakı avtomobil dayanacağı elektrik doldurma məntəqələri ilə təmin olunacaq.
Kompleksin elektrik enerjisi təminatını qismən ödəmək məqsədilə binaların damında və istifadə olunmayan boş ərazilərində günəş panelləri quraşdırılacaq.
