Milli Məclisin Səhiyyə Komitəsinin sədri, 67 saylı Sabirabad Seçki Dairəsi üzrə deputat Əhliman Əmiraslanov Sabirabad rayonunda seçicilərlə görüşüb.
AZXEBER.COM xəbər verir ki, görüş zamanı deputat vətəndaşları fərdi qaydada qəbul edib, onların müraciət və təkliflərini dinləyib, qarşılaşdıqları problemlərlə maraqlanıb.
Müraciətlər əsasən vətəndaşların müayinə və müalicəsi, ödənişsiz əməliyyatların təşkili, əlillik və əmək pensiyaları, mənzil və işlə təminat, əfv məsələləri, eləcə də digər sosial problemlərlə bağlı olub.
Bildirilib ki, müraciətlərin bir qismi yerindəcə həllini tapıb. Digər məsələlər isə nəzarətə götürülərək aidiyyəti qurumlarla əlaqələndirilib və onların həlli istiqamətində müvafiq addımlar atılıb.
Görüş zamanı Sabirabad seçiciləri deputat Əhliman Əmiraslanova vətəndaşların problemlərinin həllinə göstərdiyi köməkliyə görə təşəkkür ediblər.
Seçicilər, həmçinin rayonun sosial və infrastruktur problemlərinin həllində deputatın iştirakını yüksək qiymətləndiriblər. Xüsusilə kənd yollarının təmiri və asfaltlanmasının dövlət proqramına daxil edilməsi, eləcə də işlərin sürətləndirilməsi istiqamətində göstərdiyi təşəbbüslərə görə minnətdarlıqlarını bildiriblər.
Qeyd edək ki, Əhliman Əmiraslanov 67 saylı Sabirabad Seçki Dairəsindən Milli Məclisə deputat seçilib.
