2026-cı ilin fevral ayının sonundan etibarən qlobal buğda bazarında ciddi gərginlik müşahidə olunur. Çikaqo Ticarət Birjasında buğda fyuçerslərinin qiyməti həftəlik müqayisədə təxminən 5% artıb. Bu göstərici fevral ayından bəri qeydə alınan ən yüksək artım hesab olunur.
Belə vəziyyət adətən məhsulların, xüsusilə də un və çörək kimi əsas ərzaq məhsullarının qiymətində artım ehtimalını gündəmə gətirir.
İqtisadçı Natiq Cəfərli AZXEBER.COM-a açıqlamasınsa deyib ki, Azərbaycanda çörək böhranı gözlənilmir:
"Azərbaycanda çörək və buğda ilə bağlı böhran gözlənilmir. Ölkə elə bir regionda yerləşir ki, ətrafında bir sıra iri buğda istehsalçıları mövcuddur. Hazırda Azərbaycanın istehlak etdiyi buğdanın təxminən 75 faizi xaricdən idxal olunur, 25 faizi isə ölkə daxilində istehsal edilir. Bununla belə, yerli istehsalın artırılması hesabına bu göstəricinin 50 faizə qədər yüksəldilməsi potensialı mövcuddur”.
O qeyd edib ki, Azərbaycanın təxminən 270 günlük buğda ehtiyatı mövcuddur:
"Qonşu ölkələr - Qazaxıstan, Rusiya və Ukrayna böyük taxıl istehsalı və ixrac imkanlarına malikdir. Xüsusilə Qazaxıstanla Azərbaycan arasında uzunmüddətli buğda tədarükü ilə bağlı müqavilələr qüvvədədir. Eyni zamanda, Azərbaycanın təxminən 270 günlük buğda ehtiyatı mövcuddur”.
İqtisadçı vurğulayıb ki, çörəyin qiymətində artım ehtimalı istisna edilmir:
"Çörəyin qiymətində artım ehtimalı istisna edilmir. Çox güman çörəyin qiyməti artacaq. Dünya bazarlarında baş verən dəyişikliklərə uyğun olaraq un məmulatlarının da qiymətində bahalaşma müşahidə oluna bilər. Lakin bu, ölkədə çörək qıtlığı yaranacağı anlamına gəlmir”.
Şahanə Ziyad
