Hava limanının olması bir ölkə üçün böyük üstünlük təmin etsə də, dünyada heç bir hava limanı olmayan beş ölkə var.
AZXEBER.COM xarici mətbuata istinadən xəbər verir ki, hava limanları ticarət, turizm və ümumi nəqliyyatın mərkəzində yerləşərək, iqtisadi artıma, iş imkanlarına və həyat səviyyəsinin yüksəlməsinə töhfə verir.
Bununla belə, Avropada bir neçə kiçik ölkə var ki, onların öz hava limanları yoxdur.
Həmin ölkələri təqdim edirik:
ANDORRA
Hava limanı olmayan ölkələr arasında ən böyük əhalisi və səth sahəsinə malik olan Andorra İspaniya ilə Fransa arasında yerləşir. Ölkədə üç özəl heliport var. Onlardan biri xəstəxanada istifadə üçün nəzərdə tutulub.
Andorraya ən yaxın böyük hava limanları İspaniyadakı "Barselona-El Prat" Hava Limanı və Fransadakı "Tuluza-Blagnac" Hava Limanıdır. Bu hava limanları Andorraya uzun məsafəli səyahət edənlər üçün əsas giriş nöqtələridir.
LİXTENSŞTEYN
Mərkəzi Avropa Alp dağlarında Avstriya və İsveçrə arasında sıxışan alman dilli mikrodövlət Lixtenşteyn Avropanın dördüncü ən kiçik ölkəsidir və heç bir milli borcu olmayan azsaylı dövlətlərdən biridir.
Hava limanı olmasa da, ölkənin cənubundakı Balzers şəhərində heliport var. Ən yaxın böyük hava limanı Sürix hava limanıdır (ZRH). Buradan qatarla Buch və Sargans stansiyalarına çata bilərsiniz. Bu nöqtələrdən sonra avtobusla Lixtenşteynə getmək mümkündür.
MONAKO
Dünyanın ən məşhur mikro dövlətlərindən biri olan Monakonun hava limanı yoxdur, lakin Fontvieille rayonunda "Monako" Heliportu var.
Fransız Rivierasında şimaldan, şərqdən və qərbdən Fransa ilə əhatə olunmuş Monako, İtaliyanın Liguriya bölgəsindən cəmi bir neçə kilometr məsafədədir. Dünyanın ən zəngin və ən bahalı bölgələrindən biri kimi tanınan bu ölkədə təxminən 39 min insan yaşayır.
SAN MARINO
Dünyanın ən qədim respublikası olan San Marino Avropanın Vatikandan sonra ən az əhalisi olan ölkəsidir. İtaliyanın şimal-şərqindəki Apennin dağlarında yerləşir. Dənizlə birbaşa əlaqəsi olmasa da, şimal-şərq sərhədi İtaliyanın Rimini şəhəri vasitəsilə Adriatik dənizindən cəmi 10 kilometr məsafədədir.
Ölkədə heliport və Torraccia hava limanı var. Torraccia hava limanında 680 metr uzunluğunda ot örtüyü olan uçuş-enmə zolağı var. Ən yaxın böyük hava limanları Federico Fellini Beynəlxalq Hava Limanı (RMI) - Rimini və Bolonya Guglielmo Marconi Hava Limanıdır (BLQ).
VATİKAN
Dünyanın ən kiçik müstəqil dövləti olan Vatikan şəhəri cəmi 0,44 km² əraziyə malikdir, ona görə də hava limanı tikmək fiziki cəhətdən mümkün deyil. Bununla belə, qərb küncündə heliport var. Bu heliport tez-tez Papa, Vatikan rəsmiləri və ölkəyə gələn yüksək səviyyəli qonaqlar tərəfindən istifadə olunur.
Gülay
