Qara dəniz İqtisadi Əməkdaşlıq Təşkilatına (QDİƏT) üzv dövlətlərin beyin mərkəzlərinin beynəlxalq forumunun Azərbaycanda keçirilməsi təsadüf deyil.
Çünki Azərbaycan hazırda bölgənin və dünyanın əsas müzakirə məkanlarından birinə çevrilib. Ölkə prezidentinin də qeyd etdiyi kimi, Azərbaycansız bu bölgədə, bu regionda heç bir layihə həyata keçirilə bilməz. Bu fikirləri Azərbaycan Respublikasının Prezidenti yanında Strateji Araşdırmalar Mərkəzinin (SAM) təşkil etdiyi 2 günlük “Şərq-Qərb Strateji Körpüsü: QDİƏT Regionunda Təhlükəsizlik, İnkişaf və İnteqrasiya” adlı beynəlxalq forumun açılış mərasimində çıxışı zamanı Prezident Administrasiyasının Siyasi təhlil və informasiya təminatı şöbəsinin müdiriElnur Aslanovbildirib. PA rəsmisi qeyd edib ki, o, 2 günlük tədbirin çox önəmli, faydalı və səmərəli olacağı qənaətindədir. E.Aslanovun bildirdiyinə görə, QDİƏT-in yaranmasından 21 il keçir və bu məkan ötən illər ərzində təkcə Qara dəniz hövzəsini deyil, Xəzər hövzəsini də əhatə edir: “Ötən illər ərzində Qara dəniz hövzəsinin coğrafiyası genişlənərək təkcə həmin məkanla məhdudlaşmayıb. Artıq Qara dənizdən başlayaraq Xəzər hövzəsinə qədər geniş bir coğrafi məkan göz önünə gəlir. Bu region artıq geostrateji bir məkana çevrilib. Təsadüfi deyil ki, Qara dəniz hövzəsi ölkələrinə nəql olunan karbohidrogen ehtiyatlarının əsas istehlakçısı Azərbaycandır. Odur ki, 2 günlük tədbirdə həm bu məsələ, həm nəqliyyat dəhlizi məsələsi, həm də Qara dəniz və Xəzər dənizi hövzəsi ölkələrində yaşanan etnik münaqişələr müzakirə mövzusu olacaq”. Cənubi Qafqaz əhalisinin 65 faizini, bu bölgənin iqtisadiyyatının isə təxminən 70 faizdən çoxunu Azərbaycanın payına düşdüyünü qeyd edən E.Aslanov bildirib ki, Azərbaycanın iştirakı olmadan bu gün bu bölgədə hansısa bir layihə həyata keçirilə bilməz: “Lakin çox təəssüflər olsun ki, Qara və Xəzər dəniz hövzəsi etnik separatizm meylləri ilə “zəngin” bir məkana çevrilib. Təxminən 25 ilə yaxındır ki, Azərbaycan Ermənistanın hərbi təcavüzünə məruz qalıb, torpaqlarının 20 faizi işğal altındadır və bu işğal faktı Ermənistanın qeyri-konstruktivliyi üzündən bu gün də davam etməkdədir. Ermənistanın bu illər ərzində qeyri-konstruktiv mövqeyi sülhün, sabitliyin yaranmasına imkan vermir. Onu da qeyd edim ki, bu gün işğalçı Ermənistanı iqtisadi və siyasi cəhətdən tam müstəqil dövlət hesab etmək olmaz”. E.Aslanov vurğulayıb ki, hər il bu ölkəni ən azı 100 minlərlə insan tərk edir, ölkə iqtisadiyyatı çökmə ərəfəsindədir: “Ümumiyyətlə, bu gedişlə bir neçə ildən sonra Ermənistanın bir dövlət olaraq mövcudluğu belə sual altında ola bilər. Bu ölkənin çökməsi gözləniləndir. Bu baxımdan hesab edirik ki, nəhayət, beynəlxalq aləm, Ermənistan-Azərbaycan münaqişəsinin həlli ilə məşğul olan vasitəçiləri Ermənistanı konstruktiv mövqeyə gəlməyə məcbur etməlidirlər”. Onun fikrincə, vasitəçilər öz təzyiq rıçaqlarını işə salmalıdırlar ki, Ermənistan nəhayət sülhə gəlməyə məcbur olsun və bu bölgədə sülh və əmin-amanlığın yaranmasında iştirakçı bir dövlətə çevrilsin: “Biz danışıqlar prosesinin davam etdirilməsinin tərəfdarıyıq və hələ də bundan ümidlərimizi itirməmişik. İstəyirik ki, 25 ilə yaxın davam edən münaqişə sülh yolu ədalətli həllini tapsın. Ancaq bu variant mümkün olmasa, Azərbaycan beynəlxalq hüququn verdiyi imkanlardan istifadə edərək digər vasitələrdən istifadə edə bilər. Buna bizim böyük potensialımız var. Bu gün Azərbaycanın hərbi büdcəsi Ermənistanın bütövlükdə dövlət büdcəsinə bərabərdir”.
