Honkonqda meymunçiçəyi virusuna yoluxmanın daha bir yeni halı qeydə alınıb. Şəhərdə yoluxanların sayı nəzərəçarpacaq dərəcədə artıb.

AZXEBER.COM xəbər verir ki, avqust ayından bəri 21 yoluxma halı aşkarlanıb ki, bu da ilin əvvəlindən qeydə alınan bütün halların 70%-ni təşkil edir.

Yerli Səhiyyə İdarəsinin məlumatına əsasən, sonuncu yoluxan şəxs 29 yaşlı kişidir. Onda səpgi, qızdırma və limfa düyünlərinin böyüməsi müşahidə olunub. Aparılan analizlər meymunçiçəyi virusuna yoluxmanı təsdiqləyib. Hazırda xəstənin vəziyyəti stabildir.

Epidemioloji araşdırmanın nəticələrinə görə, avqust ayından bəri yoluxan 21 nəfərin hamısının riskli cinsi əlaqələri olub. Onların əksəriyyəti peyvənd olunmayıb. Son aylarda xəstələrin yarıdan çoxu tanışlıq tətbiqləri vasitəsilə partnyorlarla tanış olub. Bəzi şəxslər isə yoluxduqdan sonra həmin partnyorlarla əlaqə saxlaya bilməyiblər ki, bu da yoluxma zəncirinin izlənilməsini çətinləşdirib.

Bildirilib ki, 2022-ci ildən bəri Honkonqda ümumilikdə 114 yoluxma halı qeydə alınıb. Onlardan 30-u 2026-cı ilin əvvəlindən etibarən aşkarlanıb.

Səlahiyyətli qurumlar peyvəndləmə proqramını genişləndirir, yüksək risk qrupuna daxil olan insanları peyvənd olunmağa və riskli təmaslardan çəkinməyə çağırırlar.

Modern.az///