Türkiyənin "Fənərbaxça" klubu "Sabah"ın baş məşqçisi Valdas Dambrauskası komandanın yeni çalışdırıcısı vəzifəsinə gətirməyi nəzərdən keçirir.
AZXEBER.COM oxu.az-a istinadən xəbər verir ki, bu barədə İtaliyanın "TuttoMercatoWeb" nəşri məlumat yayıb.
Məlumata görə, hazırda Azərbaycanın bu mövsüm Çempionlar Liqasında debüt edən "Sabah" klubunu çalışdıran litvalı mütəxəssislə əlaqələr intensivləşib. Tərəflər razılaşmanı yaxın günlərdə yekunlaşdırmaq üçün danışıqları davam etdirirlər.
49 yaşlı mütəxəssisin "Sabah"dan ayrılaraq Türkiyəyə yollanması və "Fənərbaxça"nın baş məşqçisi vəzifəsini tutması ilə nəticələnə biləcək razılaşmanın əldə olunması üçün intensiv müzakirələr aparılır.
İsmail Kartalın istefasından sonra İstanbul təmsilçisi hazırda baş məşqçisizdir. Kartal təyinatından dörd ay sonra, komanda ilə keçirdiyi 18 oyunda orta hesabla 1.78 xal topladıqdan sonra vəzifəsindən ayrılıb.
Hazırda 2029-cu ilədək qüvvədə olacaq üçillik müqavilənin imzalanması müzakirə edilir. Razılaşmanın əldə olunması yaxındır və danışıqların müsbət nəticələnəcəyi gözlənilir.
Əgər bu keçid baş tutmasa, hazırda "sarı bülbüllər"in müvəqqəti baş məşqçisi olan niderlandlı Dirk Kuyt əsas alternativ olaraq qalacaq.
