ABŞ dövlət katibi Marko Rubio fransalı həmkarı Jean-Noel Barrot-a "ABŞ istənilən vaxt iranlılarla birbaşa əlaqə saxlamağa hazırdır” deyib.
AZXEBER.COM xarici mətbuata istinadən xəbər verir ki, Fransa xarici işlər naziri Barrot və Rubio gecə etdikləri telefon danışığında İranın nüvə məsələsini müzakirə ediblər.
Mətbuatın adı açıqlanmayan Fransa diplomatik mənbəsinə istinadən verdiyi məlumata görə, iki nazir İranın nüvə və ballistik proqramlarının İsrail və Avropa üçün təhlükə yaratdığını bildiriblər.
Xəbərdə Rubionun Fransa naziri Barrota "ABŞ-ın istənilən vaxt iranlılarla birbaşa əlaqə saxlamağa hazır olduğunu” dediyi iddia edilib.
Barrot isə amerikalı həmkarına bu gün İsveçrənin Cenevrə şəhərində Fransa, Almaniya, Böyük Britaniya və İran xarici işlər nazirləri ilə Avropa İttifaqının (Aİ) Xarici İşlər və Təhlükəsizlik Siyasəti üzrə Ali Nümayəndəsi Kaja Kallas arasında keçirilməsi gözlənilən görüşdə izləyəcəkləri yanaşma haqqında məlumat verib.
Bildirilib ki, sözügedən avropalı siyasətçilər İranın xarici işlər naziri Abbas Erakçini ölkəsinin nüvə proqramı ilə bağlı diplomatik prosesə qayıtmağa və danışıqları davam etdirməyə çağıracaqlar.
Gülay
