Milli Qəhrəman Mübariz İbrahimov adına Gənclərin I Ümumrespublika Teatr Festivalının final mərhələsinə start verilib.
Bu gün Gənc Tamaşaçılar Teatrında Gənclər və İdman, Mədəniyyət və Turizm nazirliklərinin dəstəyi ilə keçirilən festivalın açılış mərasimi olub. AZXEBER.COM-un məlumatına görə, mərasim Azərbaycanın Milli Qəhrəmanı Mübariz İbrahimovun və bütün şəhidlərin xatirəsini bir dəqiqəlik sükutla yad etməklə başlayıb. Tədbirdə gənclər və idman nazirinin müavini İntiqam Babayev, mədəniyyət və turizm nazirinin müavini Vaqif Əliyev, millət vəkilləri Gülər Əhmədova, Qənirə Paşayeva, Etibar Hüseynov, Fəzail Ağamalı, Sahib Alıyev, incəsənət xadimləri, Azərbaycanda fəaliyyət göstərən gənclər təşkilatlarının, QHT-in nümayəndələri iştirak edib.
Layihənin ideya müəllifi, millət vəkili Jalə Əliyeva bildirib ki, 4 bölgə - İsmayıllı, Ucar, Mingəçevir, Zaqatala və 8 paytaxt truppasının iştirak etdiyi festivala ümumilikdə 100-dən çox gənc qatılıb. İlkin mərhələdə 20-dən çox ssenari təqdim olunub ki, onlardan da 12-si seçilib. Millət vəkili festival çərçivəsində “Art-kamp” keçirildiyini də qeyd edib. Azərbaycan tarixində ilk dəfə keçirilən“Art-kamp”da tanınmış sənət adamları gənclərə ustad dərsi deyib.
Daha sonra çıxış edən festivalın icraçı direktoru Ramil Ağasiyev festivalın itirakçıları barəsində və festival müddətində baş verənlərlə bağlı ictimaiyyət nümayəndələrinə məlumat verib. O, bu festivalın keçirilməsində yaxından göstərilən dəstəklə bağlı adı çəkilən hər iki nazirliyə minnətdarlığını bildirib: "Bu festivalın keçirilməsində yaxından dəstək olduqları üçün Gənclər və İdman naziri Azad Rəhimova və Mədəniyyət və Turizm naziri Əbülfəz Qarayevə festival iştirakçıları adından minnətdarlığımı bildirirəm".
İntiqam Babayev və Vaqif Əliyev bu festivalın gənclərdə milli vətənpərvərlik ruhunun formalaşmasına kömək edəcəyini deyiblər.
Daha sonra AZXEBER.COM portalının redaktoru Hacıbəy Heydərli çıxış edib. O qeyd edib ki, AZXEBER.COM xəbər portalı yarandığı ilk gündən bu günə qədər gənclərin yanındadır: Bizim portal gənclərin meydanıdır. Qürur hissi keçirirəm ki, bu cür festivala da məhz biz informasiya dəstəyi veririk".
Ardınca festivalda iştirak edəcək 12 truppa və münsiflər heyəti təqdim edilib.
Festival iştirakçılarının Azərbaycan dövlət himnini ifasından sonra festivalda tamaşaların nümayişi başlayıb. Bu gün “Mənim düşmən oyuncağım”, “Xocalı fəryadı”, “Mələklərin laylası” və “O an bizim gözümüzlə” tamaşaları göstərilib.
Digər tamaşaların nümayişi noyabrın 29 və 30-da baş tutacaq. Festival dekabrın 1-də qala konsertlə yekunlaşacaq. Həmin gün qaliblərin adları da açıqlanacaq.Mübariz İbrahimov adına Gənclərin I Ümumrespublika Teatr Festivalı çərçivəsində Azərbaycan tarixində ilk dəfə Art Kamp keçirilib. Art-kampda peşəkar aktyor və rejissorlar tərəfindən pulsuz ustad dərsləri və müxtəlif janrlarda seminarlar təşkil edilib.
Qeyd edək ki, Mübariz İbrahimovun xatirəsinə həsr olunmuş Gənclərin I Ümumrespublika Teatr Festivalının informasiya dəstəyi AzTV, AZXEBER.COM xəbər portalı və lent.az informasiya agentliyidir.
