"Qəbələnin Vəndam kəndində 3 günlük ev kirayələdik. Axşamdan su kəsildi səhərə qədər, səhər 3-4 qab yuyan kimi yenə kəsildi. Sonra 1 saat gözlədik ki, su dolsun. Ondan sonra işıqlar söndü-yandı. Kəndin işıqları da zəif, kondisioner işləyə bilmir. Hovuz təmiz idi, amma xlor üzgüçülük hovuzlarından belə qat-qat çox tökülmüşdü, suda göz açmaq mümkün olmurdu. 800 manat pul verdik, göstərdikləri xidmət heç nə”.
Bu sözləri bir müştəri sosial şəbəkə hesabında qeyd edib.
Qeyd edək ki, son illər günlük kirayə verilən mənzillərə tələbat artıb. Xüsusilə istirahət və səyahət məqsədilə şəhər dəyişən şəxslər hotellərə alternativ olaraq bu mənzillərə üstünlük verirlər.
Lakin sosial şəbəkələrdə günlük kirayə verilən mənzillərlə bağlı müxtəlif şikayətlərə də rast gəlinir.
Mövzu ilə bağlı AZXEBER.COM-a açıqlama verən Azərbaycan Qiymətləndiricilər Cəmiyyətinin (AQC) sədri Vüqar Oruc bildirib ki, günlük kirayə ev götürərkən evin kommunal təminatı və elanda göstərilən şəraitinin reallığa uyğun olub-olmaması əvvəlcədən yoxlanılmalıdır:
"Digər tərəfdən, həmin günlük evlərin su, qaz, işıqla təminatı, elanda və sosial şəbəkələrdə göstərilən imkanlara və şəraitə malik olub-olmaması həmin şəxsin, yəni evi götürənin və yaxud ortada vasitəçilik edən rieltorun aydınlaşdırması borcudur. Çünki həmin evin şəraiti ilk növbədə qiymətə təsir edən nüanslardır. Qiymətin formalaşmasında günlük evlərin mövcud durumunun, onların xidmət səviyyəsinin və şəraitinin çox böyük rolu var”.
O, həmçinin bildirib ki, günlük kirayə evlərin qiyməti tərəflərin qarşılıqlı razılığı əsasında müəyyən olunur:
"Günlük evlərin kirayə qiymətləri tərəflərin razılığı ilə müəyyən olunur. Hər bir ev sahibinin özünün günlük evin, kirayə evin qiymətini müəyyən etmək hüququ vardır. Qanunda bununla bağlı hər hansı bir məhdudiyyət nəzərdə tutulmayıb. Qiymət əsasən bazardan müəyyən olunur və bazar özü istənilən kirayə qiymətlərini tənzimləmək imkanlarına malikdir. O baxımdan burada hər hansı dövlət müdaxiləsi nəzərdə tutulmur və dövlət müdaxiləsi, təbii ki, sərbəst bazar iqtisadiyyatında uyğun görülmür”.
Ekspert qeyd edib ki, kirayə münasibətlərinin rəsmi şəkildə rəsmiləşdirilməsi sonradan yarana biləcək problemlərin qarşısının alınmasında mühüm rol oynayır:
"Hal-hazırda kirayə fəaliyyəti ilə bağlı biznes konkret vergiyə cəlb olunmur və dövlət müvafiq olaraq 2026-cı ildən dəyişiklik həyata keçirmişdir. Həmin dəyişikliyə görə vergilər 14 faizdən 10 faizə endirilmişdir ki, bu da vətəndaşların bu istiqamətdə fəaliyyət göstərdiyi zaman dövlət büdcəsinə vergiləri ödəməyə təşviq etmək məqsədi daşıyır.
lHesab edirəm ki, vətəndaş kirayə evi götürərkən, ilk növbədə bütün prosedurların rəsmi qaydada həyata keçirilməsinə çalışmalıdır. Yəni müqavilə bağlanmalıdır ki, həmin müqavilədə günlük evin hansı şəraitdə olması, hansı xidmətləri təqdim etmək imkanının mövcudluğu xüsusilə qeyd olunmalıdır. Əgər həmin müqavilədə göstərilən nüanslar faktiki olaraq mövcud deyilsə, vətəndaşın hüququ var ki, müqavilədə göstərilən nüanslar olmadığı üçün qarşı tərəfdən müvafiq ödənişin bir hissəsini tələb etsin və yaxud məhkəmə qaydasında müqavilənin şərtlərinə əməl edilməməsinə görə qarşı tərəfin cavab verməsini tələb etsin. O baxımdan bizim tövsiyəmiz bütün kirayə və icarə münasibətlərinin rəsmi qaydada həyata keçirilməsini təmin etmək, müqavilə ilə bu münasibətləri təsdiq etmək və qanunvericilik olaraq həmin münasibətlərdən əldə olunan gəlirdən dövlətin müvafiq vergilərini verməkdir. Əgər bütün məsələlər normal qaydada həyata keçirilərsə, sonradan sosial şəbəkələrdə gördüyün elanlarda mövcud olan şərtlərin realda olmaması ilə qarşılaşan vətəndaşlar hər hansı bir çətinliyə, hər hansı bir məhrumluğa qapılmaz və təbii ki, müqavilə insanların hər iki tərəfin hüquqlarını müdafiə etmək üçün yeganə vasitədir”.
Fəridə Əsədzadə
