Mərhum millət vəkili, ictimai xadim Qənirə Paşayevanın vəfatından üç il ötür.
AZXEBER.COM xəbər verir ki, Qənirə Paşayevanın yaxın rəfiqəsi Arzu Bağırova onun vəfatının üçüncü ildönümü ilə bağlı duyğularını bölüşüb.
Arzu Bağırova bildirib ki, 28 sentyabr mənim üçün sadəcə bir tarix deyil:
"Bəzən insan illəri sayır, amma zamanın keçdiyinə inana bilmir. Üç il əvvəl bu gün Qənirə xanımı itirdik. O gündən bəri təqvimdə 28 sentyabr mənim üçün sadəcə bir tarix deyil. Bir insanın yoxluğu necə bu qədər böyük ola bilər, bunu Qənirə xanımdan sonra öyrəndik. Onunla bağlı o qədər söz yazılıb, o qədər gözəl xatirələr danışılıb ki. Amma Qənirə xanım bütün o yazılardan da, söylənən sözlərdən də daha böyük idi. Mənim üçün o, millət vəkili, ictimai xadim, ziyalı olmaqdan əlavə yüksək keyfiyyətlərə malik bir insan idi".
Rəfiqəsi Qənirə Paşayevanın ona verdiyi məsləhətlərdən birini də xatırladıb:
"Bəzən bir söz deyərdi, insanın bütün fikrini dəyişərdi. Mənə ən böyük məsləhətlərindən biri "Heç kimə və heç nəyə reaksiya vermə. Başını aşağı sal, işini gör və faydalı olmağa çalış” idi. Bu sözləri bu gün də özümə tez-tez xatırladıram. Mənim həyatımda çox şeyə Qənirə xanımın toxunuşu var. Bəlkə də bu gün gördüyünüz işlərin bir hissəsində onun imzası görünmür, amma mən bilirəm ki, ruhu var. İnsan dünyasını dəyişəndə onunla bağlı xatirələr qalır deyirlər. Mən isə düşünürəm ki, bəzi insanlar sadəcə xatirəyə çevrilmir. Onlar həyatının içində qalırlar. Sənin danışığında, gördüyün işdə, verdiyin qərarda, kiməsə etdiyin yaxşılıqda yaşayırlar.
Qənirə xanım da mənim üçün belədir. Artıq 3 il keçsə də, amma ürəyin təqvimi yoxdur. Doğmalarının, dostlarının, onu sevən insanların qəlbində yaranan boşluq zamanla dolmur. Sadəcə insan o boşluqla yaşamağı öyrənir. Mən hələ də Qənirə xanımın adını çəkəndə içimdə qəribə bir sükut yaranır. Sanki bir anlıq hər şey dayanır və o günlər, söhbətlərimiz, gülüşlərimiz, planlarımız gözümün qarşısından keçir.
Qənirə Paşayeva ilə yarımçıq qalan söhbətlərdən söz açan Arzu Bağırova bunları deyib:
"Kaş bir dəfə də danışa biləydik. Kaş bir dəfə də "bacı, sən necə məsləhət görürsən?” deyə soruşa biləydim. Kaş bir dəfə də o özünəməxsus gülüşü ilə mənə cavab verəydi. Amma həyatın bizə öyrətdiyi ən acı həqiqətlərdən biri budur: bəzi insanlarla söhbətlərimiz yarımçıq qalır, sevgimiz isə yarımçıq qalmır.
Qənirə xanım, sənin yoxluğunla barışmadıq. Sadəcə sənsiz yaşamağı öyrənməyə çalışırıq.
Səni unutmadıq. Unutmayacağıq da.
Sənin arzularının, gördüyün işlərin, insanlara olan sevginin yaşaması üçün əlimizdən gələn hər şeyi etməyə çalışacağıq. Çünki sən bizə həmişə yaxşılıq etməyin, insanlara toxunmağın və başladığın işi yarımçıq qoymamağın yolunu göstərdin. Bu gün sənin haqqında yazarkən yenə sözlər yetmir.
Ruhun şad olsun, mənim əziz bacım.
Üç ildir yoxsan.
Amma mənim üçün hələ də çox yaxındasan".
Günel Hüseynli
