7-ci sinif dərsliyində "altruizm” sözünün işlədilməsi sosial şəbəkələrdə müzakirələrə səbəb olub. İstifadəçilər sözün şagirdlər üçün anlaşılmaz olduğunu bildirərək, onun əvəzinə daha sadə və aydın ifadələrdən, məsələn, "xeyirxah” və "fədakar” sözlərindən istifadə edilməsinin daha məqsədəuyğun olduğunu qeyd ediblər.
Təhsil eksperti Məzahir Məmmədli AZXEBER.COM-a açıqlamasında deyib ki, bu istiqamətdə işlər görülür:
"Dərsliklərin dilinin ağır olması, bəzi tarixi məlumatların düzgün işlədilməməsi və ümumilikdə dərsliklərlə bağlı ciddi narazılıq elm və təhsil naziri Emin Əmrullayev tərəfindən də ifadə olunub. 2025–2026-cı tədris ilinin əvvəlində keçirilən konfransda nazir vurğuladı ki, bundan sonra dərsliklər üçün mənəm iddiasından əl çəkərək kollektiv məhsul ortaya qoymaq lazımdır. Bu istiqamətdə müəyyən işlər görülür. Təhsil İnstitutu dərsliklərlə bağlı açıq müzakirələr aparır. Hər kəs bu mövzularla bağlı öz iradlarını, fikirlərini və təkliflərini bildirə bilər. Bununla həm mütəxəssislərin, həm valideynlərin, həm də cəmiyyətin dərsliklərlə bağlı fikir və təkliflərinin nəzərə alınmasına imkan yaradılır”.
"Təkcə bu ifadə deyil, çoxlu sayda mətnlər var ki, onların anlaşılması çətindir. Riyazi, tarixi terminlərdə də belə hallar müşahidə olunur. Buna görə də anlaşılması çətin olan məqamların aradan qaldırılması istiqamətində hər kəs Təhsil İnstitutuna öz təkliflərini verə bilər”,-deyə təhsil eksperti qeyd edib.
Şahanə Ziyad
