Son illər estetik görünüşə marağın artması plastik əməliyyatlara müraciət edənlərin sayını da artırıb. Burun estetikası, liposaksiya, qarın gərmə, üz gərmə, döş böyütmə və kiçiltmə kimi əməliyyatlar geniş yayılıb.
AZXEBER.COM xəbər verir ki, mütəxəssislər isə xəbərdarlıq edirlər ki, estetik məqsədlə həyata keçirilən hər bir cərrahi müdaxilə müəyyən sağlamlıq riskləri daşıyır və bu risklər yalnız əməliyyat zamanı deyil, illər sonra da özünü göstərə bilər.
ABŞ Qida və Dərman Administrasiyasının (FDA) məlumatına görə, plastik əməliyyatların fəsadları istifadə olunan üsuldan, pasiyentin sağlamlıq vəziyyətindən, cərrahın peşəkarlığından və əməliyyatın aparıldığı tibbi müəssisənin imkanlarından asılı olaraq dəyişir. Xüsusilə implantlardan istifadə olunan estetik əməliyyatlarda əlavə ağırlaşmaların yaranma ehtimalı mövcuddur.
Ən çox rast gəlinən ağırlaşmalar arasında infeksiya, qanaxma, hematoma, narkozla bağlı problemlər, qan laxtalanması, ağciyər emboliyası, yaraların gec sağalması, sinir zədələnməsi, çapıq toxumasının həddindən artıq formalaşması və toxuma nekrozu yer alır. Bəzi hallarda bu ağırlaşmaların aradan qaldırılması üçün pasiyent yenidən əməliyyat olunmalı olur.
Həkimlərin sözlərinə görə, infeksiya əsasən steril şəraitin pozulması, əməliyyatdan sonrakı qulluq qaydalarına əməl edilməməsi, immun sisteminin zəif olması və ya şəkərli diabet kimi yanaşı xəstəliklər səbəbindən yaranır. Qanaxma və hematoma isə damarların zədələnməsi, qan laxtalanma pozğunluqları və ya qan durulaşdırıcı preparatların istifadəsi nəticəsində baş verə bilər.
Plastik əməliyyatlarda istifadə olunan ümumi anesteziya da müəyyən risklər daşıyır. Ürək-damar və tənəffüs sistemi xəstəlikləri olan şəxslərdə narkozun fəsadları daha ağır keçə bilər. Mütəxəssislər bildirirlər ki, uzun sürən əməliyyatlardan sonra qan laxtasının yaranması və onun ağciyərə keçərək emboliyaya səbəb olması həyat üçün təhlükəli vəziyyət yarada bilər.
İmplantlardan istifadə olunan əməliyyatlarda isə əlavə risklər mövcuddur. FDA bildirir ki, döş implantları ömürlük istifadə üçün nəzərdə tutulmur. Vaxt keçdikcə implantın cırılması, yerini dəyişməsi, ətrafında sərt çapıq toxumasının yaranması, ağrı və forma dəyişikliyi müşahidə oluna bilər. Belə hallarda implantın dəyişdirilməsi və ya çıxarılması üçün əlavə cərrahi müdaxilə tələb olunur.
Həmçinin qeyd edir ki, nadir hallarda döş implantları ilə əlaqəli anaplastik iri hüceyrəli limfoma (BIA-ALCL) adlı limfa sistemi xərçəngi, eləcə də implant kapsulunda bəzi digər nadir şiş növləri aşkarlanıb. Bu halların çox az rast gəlindiyi bildirilsə də, pasiyentlərin bu risklər barədə əvvəlcədən məlumatlandırılması tövsiyə olunur.
Mütəxəssislər hesab edirlər ki, ağırlaşmaların əsas səbəbləri arasında qeyri-peşəkar cərrah seçimi, lisenziyasız klinikalarda aparılan əməliyyatlar, keyfiyyətsiz implantlardan istifadə, pasiyentin sağlamlıq vəziyyətinin düzgün qiymətləndirilməməsi, siqaret çəkmək və əməliyyatdan sonrakı tibbi tövsiyələrə əməl olunmaması dayanır.
Plastik cərrahlar bildirirlər ki, estetik əməliyyata qərar verməzdən əvvəl yalnız qiymətə deyil, həkimin ixtisasına, klinikanın lisenziyasına, istifadə olunan tibbi materialların keyfiyyətinə və əməliyyatın mümkün risklərinə diqqət yetirmək vacibdir. Onların fikrincə, pasiyent əməliyyatın mümkün fəsadları, alternativləri və sağalma prosesi barədə tam məlumatlandırıldıqdan sonra qərar verməlidir.
Şahanə Ziyad
