"Hərbçilərin maaş artımlarının təmin edilməsi üçün dövlət büdcəsindən əlavə olaraq 550 milyon manat vəsait ayrılacaq”
Bu sözləri AZXEBER.COM-a açıqlamasında hərbi ekspert Ədalət Verdiyev bildirib.
O qeyd edib ki, Silahlı Qüvvələrin hərbi qulluqçularının rifah şəraitinin yaxşılaşdırılması İlham Əliyevin daim diqqət mərkəzində olub:
"Silahlı Qüvvələrin hərbi qulluqçularının rifah şəraitinin yaxşılaşdırılması, onların sosial təminat səviyyəsinin yüksəldilməsi daim Silahlı Qüvvələrimizin Ali Baş Komandanı İlham Əliyevin diqqət mərkəzində olub. Bu, hazırda ölkəmizin təhlükəsizliyinin və Silahlı Qüvvələrinin təminatının prioritet məsələlər sırasında olması, eyni zamanda aidiyyəti qurum və strukturların müvafiq addımlar atması ilə nəticələnir.
Bu məqsədlə, son günlərdə hərbi qulluqçuların maaşlarının artırılması ilə bağlı Milli Məclisdə yeni bir qərar qəbul edilib. Qərar artıq üçüncü oxunuşdan keçib. Bu qərara əsasən, hərbi qulluqçuların maaşları beynəlxalq standartlara uyğunlaşdırılacaq. Maaşların baza hissəsi, yəni əsas hissəsi daha çox rütbə maaşı ilə ifadə olunacaq. Başqa sözlə desək, əvvəllər maaşın baza hissəsini vəzifə maaşı təşkil edirdisə, indi bu, rütbə maaşı ilə əvəz ediləcək və ümumi maaşın 70 faizini təşkil edəcək. Ümumilikdə isə bütün vergilər və icbari ödənişlər çıxıldıqdan sonra Müdafiə Nazirliyinin hərbi qulluqçularının maaşları 22,8 faiz artırılacaq”.
O vurğulayıb ki, hərbçilərin pensiya təminatında da ciddi dəyişikliklər olacaq:
"Digər tərəfdən, pensiya təminatında da ciddi dəyişikliklər olacaq. Yəni əvvəllər hərbçilərin pensiyası onların aldıqları maaşın 100 faizindən artığını təşkil edə bilməzdisə, indi yeni qanunla pensiyanın maaşdan daha artıq olmasına heç bir əngəl qalmayacaq. Hərbçilərin pensiyaları onların aldıqları maaş və hesablarında yığılan pensiya kapitalı ilə birbaşa əlaqəli olacaq. Bütün bu maaş artımlarının təmin edilməsi üçün dövlət büdcəsindən əlavə olaraq 550 milyon manat vəsait ayrılacaq.
"Hərbçilərimizin sosial təminatının yaxşılaşdırılması ilə paralel olaraq yeni hərbi infrastrukturun yaradılması, hərbi hissələrin təlim-tədris bazasının gücləndirilməsi, hərbçilərin yaşayış-məişət şəraitində ciddi dəyişikliklərin olması, azad edilən ərazilərdə, xüsusilə də Zəngəzur dağları istiqamətində, yəni Laçın, Kəlbəcər, Zəngilan istiqamətində tamamilə yeni infrastrukturun qurulması bir daha onu göstərir ki, bu gün Azərbaycan Silahlı Qüvvələrinin şəxsi heyətinin bütün növ təminat və tələbatını qarşılamaq üçün Azərbaycan dövləti əlindən gələn hər bir addımı atır”,- deyə hərbi ekspert deyib.
Şahanə Ziyad
