Türkiyənin milli müdafiə naziri Hulusi Akar bəyan edib ki, Qafqazda sülh və sabitliyin əldə olunması üçün Ermənistan Qarabağın işğalına son qoymalıdır.
Böyük Britaniyanın "Britaniya-Türkiyə Anlayış Mərkəzi” tərəfindən təşkil olunan "Dəyişən qlobal və regional təhlükəsizlik mühitində Türkiyə” başlıqlı proqramında çıxışı zamanı Akar Ermənistanın Azərbaycana hücumu haqqında danışıb.
Türkiyə dövlət rəsmisi bildirib ki, son hadisələr bir daha İrəvanın regionda sülh və sabitliyə ən böyük əngəl olduğunu sübut edib.
Nazir qeyd edib ki, Ermənistanın hücumları beynəlxalq hüququn pozulmasıdır və Türkiyə bu hücumları pisləyir: "Qarabağ və ətraf rayonların işğalı Azərbaycanda 1 milyondan çox insanın evlərini tərk etməsinə səbəb olub. Regionda sülh və sabitliyin təmin olunması üçün erməni işğalına son qoyulmalıdır. Türkiyə, xalqını və ərazi bütövlüyünü qoruyan Azərbaycanla həmrəydir və onu dəstəkləməyə davam edəcək”
