T. Məmmədov Ömər və Suadanın müsabiqədə çox gözəl çıxış etdiyini vurğulayıb: “Onların oxumağı bir yana, ünsiyyətləri hər kəsi təəccübləndirdi. Canlı efirdə Ömərin aparıcı ilə ingiliscə dialoqunu hamı izləyib. Onlar doğrudan da çox sərbəst idilər. Etiraf etmək lazımdır ki, bütün bu xüsusiyyətləri özündə cəmləyən uşaqlarımızın sayı kifayət qədər deyil. Nəinki, uşaqların böyük müğənnilərimizin də hamısı belə vərdişlərə tam yiyələnməyib. Amma “Eurovision” Mahnı Müsabiqəsi bizim musiqiçilərimizin, gənc istedadlarımızın dünya çapında özlərini göstərməsi, həmin tələblərə uyğunlaşması üçün çox böyük bir stimul və platformadır. Bizim ölkədə istedadlı adamlar yaşından, kimliyindən asılı olmayaraq böyük dəstək alırlar. Buna qısqanmaq lazım deyil. Yeri gəlmişkən, bu ilki müsabiqə uşaq hüquqlarına həsr olunmuşdu. İndi nə təklif edirsiniz, valideynləri vəzifədə olan bütün uşaqların hüquqlarını əlindən alaq, onları heç hara buraxmayaq? Bu uşaqlar milyonlarla tamaşaçının gözü qarşısında seçilib. Əgər onların istedadı yox idisə, bunu seçim vaxtı niyə yazmırdılar? İndi guya bu işdə qüsur tutublar. Bu absurd bir fikirdir və məncə, belə dayaz düşüncələrdən uzaq olmaq lazımdır. Bu iki istedadlı uşaq çox gözəl çıxışlarına baxmayaraq, onlar bu və ya digər səbəbdən layiq olduqları yeri tuta bilmədilər. Bunu hətta təşkilatçılar da etiraf etdilər. Məncə, biz hamımız indi onlara belə yersiz psixoloji təsir göstərməkdənsə, onları təbrik etməli və dəstəkləməliyik. Biz bir komanda olaraq Ömər və Suadaya təşəkkür edirik”.
“Bu gizli bir məsələ deyil. Bəli, Ömər Sultanov İsmayıl Ömərovun nəvəsidir. Amma müsabiqədə iştirak edən 40-a yaxın uşağın arasından münsiflər heyəti ən yaxşıları seçdi və onlar ən qısa zamanda gözəl hazırlaşa bildilər. Düzdür, bizim istedadlı uşaqlarımız çoxdur, amma məsələ burasındadır ki, onları ortaya çıxarıb yetişdirən ayrı-ayrı təşkilatların sayı kifayət qədər deyil. Məsələn, əksər ölkələrdə uşaq kanalları fəaliyyət göstərir və daim bu efir istedadlı uşaqların ortaya çıxmasında əvəzsiz rol oynayır. Bu cür institutlar həm də uşaqların formalaşmasında, müasir tələblərə uyğun bir çox qabiliyyətlərə yiyələnməsinə imkan yaradır”.AZXEBER.COM-un məlumatına görə, bunu İctimai Televiziyanın İctimaiyyətlə əlaqələr şöbəsinin rəhbəri Tahir Məmmədov “Azərbaycanın Uşaq “Eurovision” Mahnı Müsabiqəsində çıxışı ilə bağlı mətbuatda dərc olunan fikirlərə cavab olaraq bildirib.
