İranda qızlar üçün islam dəyərlərinə uyğun velosiped hazırlanır
MARAQLI
12:25 04.11.2011
2710
İranda xüsusi olaraq qız və qadınlar üçün İslami dəyərlərə uyğun velosiped hazırlanır. İranın yanacaq və nəqliyyat qərargahı idarəsinin rəhbəri Muhammed Royanian bildirib ki, hazırkı şərtlərdə qadınların kişilərlə paralel olaraq velosiped sürməsi mümkün deyil: “Lakin hazırda qadınlar və qızlar üçün xüsusi velosipedlərin hazırlığı gedir. Bu elə bir velosiped olmalıdır ki, qadınların təhlükəsizliyini təmin etməklə bərabər, həm də İslami dəyərlərə uyğun olsun”. İran prezidenti yanında ailə və qadın məsələləri üzrə Mərkəzin rəsmi nümayəndəsi Zəhra Sədcadi isə məsələ ilə bağlı deyib ki, şəhərin küçələrində qızların velosiped sürməsi İslami dəyərlərə ziddir: “Qadınların küçələrdə velosiped sürməsi imanlı insanlarda etiraz hissi doğurur. Belə ki, velosiped sürən qızlar dar və münasib olmayan paltarlar geyinirlər ki, bu da cəmiyyətdə şəriət geyimi normalarının pozulmasının genişlənməsinə səbəb olur”.
