İraq Küveytlə sərhədlərin demarkasiyasını müzakirə etmək üçün komissiya yaratmağı planlaşdırır.
AZXEBER.COM "Report"a istinadən xəbər verir ki, bunu İraqın xarici işlər naziri Fuad Hüseyn Bağdadda küveytli həmkarı Salem Abdullah əl-Cabir əs-Sabah ilə keçirdiyi mətbuat konfransında deyib.
"İraq Xarici İşlər Nazirliyi nəzdində Küveyt tərəfi ilə birlikdə dövlətlər arasında sərhədlərin demarkasiyasına nəzarət edəcək yüksək komissiya yaradılacaq”, - Fuad Hüseyn bildirib.
Nazir vurğulayıb ki, tərəflər sərhəd zonasında yerləşən və buna görə də iki ölkənin birgə yurisdiksiyasında olan neft yataqlarını, həmçinin 1990-1991-ci illərdə Körfəz müharibəsi zamanı əsir və itkin düşmüş şəxslərin axtarışını müzakirə ediblər.
Küveytin xarici işlər naziri İraqın Bəsrə şəhərində (ölkənin cənubunda) öz dövlətinin konsulluğunda ticarət bürosunun tezliklə açılacağını elan edib.
Qeyd edək ki, İraq-Küveyt sərhədi 1993-1994-cü illərdə hər iki tərəf tərəfindən tanınıb. Bununla belə, bəzi iraqlı siyasətçilər vaxtaşırı çəkilmiş sərhədləri Bağdada münasibətdə ədalətsiz qərar adlandırır və hakimiyyət orqanlarını sərhədlərin demarkasiyasına çağırırlar. Bu günə qədər İraq və Küveyt nümayəndələrindən ibarət texniki komitə sərhədlərin demarkasiyası məsələlərinə dair 6 iclas keçirib.
