30 oktyabr 2013-cü ildə Park Cinema kinoteatrlar şəbəkəsi, Avropa İttifaqı Nümayəndəliyi (Aİ) və Avropa İttifaqına Üzv Dövlətlərin Azərbaycanda təmsil olunmuş Səfirlikləri mədəniyyət və beynəlxalq münasibətlərin inkişafı sahəsində növbəti möhtəşəm layihəyə start verəcəklər. Festival zamanı Aİ-na üzv olan 17 ölkədən və Azərbaycandan filmlər nümayiş etdiriləcək, nümayiş etdirilən filmlər barədə ekspertlər və maraqlanan tamaşaçılar arasında dialoq aparmaq mümkün olacaqdır.
2013-cü ilin Avropa Film Festivalının proqramına 17 Avropa filmi (Avstriya, Belçika, Xorvatiya, Çex Respublikası, Estoniya, Finlandiya, Fransa, Almaniya, Macarıstan, İtaliya, Latviya, Litva, Hollandiya, Polşa, Rumıniya, İsveç və Birləşmiş Krallıq) və bir Azərbaycan filminin nümayişi daxildir. Qeyd edək ki, Estoniya, Finlandiya və Xorvatiya Festivalda ilk dəfə iştirak edəcəklər.
Festivalın açılışı "Antibə bir tərəfə bilet" İsveç filminin nümayişi ilə baş tutaçaq və bu filmin rejissoru Riçart Hobert filmi şəxsən təqdim etmək üçün 30 oktyabr tarixində Bakıya gələcəkdir. Festivalın digər fəxri qonaqları Böyük Britaniyadan ssenarist Pol Freyzer, "Atəşli ürək. Tadas Blinda haqqında əfsanə" Litva filminin operatoru Ramunas Qreysius, Vyanada eyni adlı "Üçüncü Adam" Muzeynin Direktoru Jerar Ştrassqşvantner, "Xəyalların komandası 1935" Latviya filminin prodüseri Liqa Pipare və administratoru Diana Stepan və digərləri olacaqdır. Filmlərdən sonra tamaşaçılara qonaqlarla interaktiv müzakirələrdə iştirak etmək şansı veriləcəkdir.
Festivalın Bakıda 3 kinoteatrda keçirilməsi daha bir yenilikdir: filmlər Park Cinema (Park Bulvar), Park Cinema (Metro Park) və Nizami Kino Mərkəzində nümayış olunacaqdır.
Azərbaycan ictimaiyyətinin geniş iştirakını təmin etmək üçün hər film 2 sessiya ilə nümayiş etdiriləcək və bütün filmlərə giriş ödənişsiz olacaqdır. Biletlər Park Cinema şəbəkəsinin kassalarından əldə oluna bilər.
Avropa Film Festivalı və filmlərin cədvəli haqqında əlavə məlumat üçün www.parkcinema, www.facebook.com/ParkCinemavə yawww.eeas.europa.eu/delegations/azerbaijan səhifələrinə daxil olun.
Xatırladaq ki, Avropa Film Festivalı artıq üçüncü dəfədir ki, Park Cinema-da həyata keçirilir.
Ölkədə ilk yeni nəsil kinoteatrlar şəbəkəsi olan Park Cinema 16 oktyabr 2010-cu il tarixində fəaliyyətə başlamışdır. Hal-hazırda şəbəkə 3 kinoteatr, 13 zal və 2200-dən artıq oturacaq yerlə təqdim olunub.
Şəbəkənin kinoteatrlarında ən son texnologiyalardan istifadə olunmuş və kinoproyeksiya sahəsində təqdim olunmuş aparıcı brendlərdən olan avadanlıqlar quraşdırılmışdır. Şəbəkə və repertuar haqqında ətraflı məlumatı www.parkcinema.az saytından və Facebook sosial şəbəkə səhifəsindən https://www.facebook.com/ParkCinema əldə etmək olar.
