Süni intellektin təhsil və karyera planlamasına daxil olması gənclər üçün yeni imkanlar açsa da, taleyüklü qərarlarda texnologiyaya kor-koranə etibar etmək ciddi risklər yaradır. İxtisas seçimi abituriyentin təkcə bilik səviyyəsini deyil, həm də daxili dünyasını, xarakterini və gələcək hədəflərini əhatə edən mürəkkəb prosesdir. Alqoritmlər böyük məlumat bazalarını saniyələr ərzində analiz edə bilsə də, insan amilini tamamilə əvəzləmək gücündə deyil.
Təhsil eksperti Elçin Əfəndi mövzu ilə bağlı demokrat.az-a açıqlamasında bildirib ki, ixtisas seçimi zamanı süni zəkanın təqdim etdiyi müəyyən məlumatlardan istifadə etmək mümkündür. Lakin bu məlumatlar hər zaman dəqiq olmaya bilər.
"Çünki süni zəkanın təqdim etdiyi məlumatlar əsasən köhnə məlumat bazasına əsaslanır. Yeni məlumatlara əsaslanmadığı üçün ona tam güvənmək olmaz. Burada həm tələbənin maraqları, həm psixoloji xüsusiyyətləri, həm də ixtisasla bağlı yanaşması və s. düzgün qiymətləndirilməlidir. Bunu isə insan mütəxəssisi daha dəqiq qiymətləndirə və düzgün istiqamətləndirə bilir. Süni zəka bu prosesdə hələ ki geri qalır və düşünürəm ki, bu, süni zəkanın tam idarə edə biləcəyi bir proses deyil. Müəyyən tövsiyələr, yanaşmalar və dəqiqləşdirmələr təqdim edə bilər. Amma yekun qərarın verilməsində süni zəkanın həlledici rolu yoxdur”.
Ekspert qeyd edib ki, artıq 4–5 ildir müxtəlif platformalar istifadəyə verilsə də, onların hamısını uğurlu hesab etmək olmaz.
"Çünki bəzi platformalarda ixtisas kodları və ya ixtisaslarla bağlı məlumatlar yanlışdır. Dediyim kimi, köhnə məlumatlara əsaslandıqları üçün belə problemlər mövcuddur. Buna görə də süni zəka bu prosesdə insanı əvəz edə bilməz”, – deyə ekspert fikrini tamamlayıb.
