Jurnalistlərin Həmkarlar İttifaqı (JuHİ) iyunun 19-da Tərtər şəhərində “Modern ailə prinsiplərinin regional media müstəvisində təbliğinə yardım” mövzusunda dəyirmi masa keçirib.
Beynəlxalq Avrasiya Mətbuat Fondunun təsis etdiyi Peşə Təlim Mərkəzində keçirilən tədbirə cəbhə bölgəsində fəaliyyət göstərən yerlimedia əməkdaşları, həmçinin, paytaxtda fəaliyyət göstərən KİV-lərin Qarabağ bölgəsi üzrə akreditasiya olunmuş nümayəndələri, yerli QHT-lərin vəictimaiyyətin nümayəndələri qatılıblar.
JuHİ sədri Müşfiq Ələsgərli bildirib ki, layihənin həyata keçirilməsində məqsəd ölkənin regionlarında ailə institutunun sağlam dəyərlər üzərində modernləşməsinə yardım etməkdən və bu işdə yerli KİV-lərin rolunun artırılmasından ibarətdir: “Dəyirmi masada bölgədə fəaliyyət göstərən KİV-lərin ailə-məişət və yetkinlik yaşına çatmayanlar mövzusunda materiallar yaymaq işinin təkmilləşdirilməsinə yardım göstərilməsi müzakirə olunub. Biz yerli ictimaiyyət nümayəndələri ilə media təmsilçilərini bir araya gətirib sağlam müzakirələr keçirə bildik. Ailələrlə KİV redaksiyaları arasında təmasların intensivləşməsi, KİV redaksiyalarında isə ailə münasibətlərinə həssas yanaşmaq vərdişlərinin yaranması bölgədə ailə münasibətlərinin sağlam müstəvidə inkişafına mühüm töhfə verəcək”.
JuHİ sədri bildirib ki, təşkilat Tərtər şəhərindən öncə digər region və rayonlarda da bənzər tədbirlər keçirib və bu yöndə fəaliyyət davam etdiriləcək.Növbəti mərhələdə bənzər tədbirlər Şimal bölgəsinə daxil olan rayonlarda gerçəkləşdiriləcək.
Məlumat üçün qeyd edək ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə həyata keçirilən tədbirə Şuranın koordinatoru Nigar Ağakişiyeva,Jurnalist Araşdırmaları Mərkəzinin sədri Seymur Verdizadə də qatılaraq tədbir iştirakçılarını maraqlandıran sualları cavablandırıblar.
