Xəbər verdiyimiz kimi, Azərbaycan yığma komandası futbol üzrə dünya çempionatının seçmə mərhələsini 1 xalla bitirib. Milli komandamız bu nəticəylə öz anti-rekordunu təkrarlayıb.
Böyük ümidlər bəslənən Azərbaycan millisinin biabırçı çıxışı sosial şəbəkələrdə də böyük etirazla qarşılanıb.
Milli Məclisin deputatı Aqil Abbas AZXEBER.COM-a deyib ki, regionlarda futbol olmadığı müddətdə inkişaf da olmayacaq:
"Lüksenburq Avropa ölkəsidir və orada futbol inkişaf edib. Bizə gəldikdə isə, nə qədər ki regionlarda futbol yoxdur, Azərbaycanda heç vaxt futbol olmayacaq. "Keşlə"ni aparıb Şamaxıda oynatmaqla Azərbaycan futbolu inkişaf etməyəcək. Şamaxının özündə komanda yaratmaq lazımdı. Azərbaycanda hər zaman ən yaxşı oyunçular Tovuz, Gəncə, Şəmkir, Mingəçevir, Quba, Lənkəran və digər regionlardan çıxıb. Əgər regionlarda futbol yoxdursa hansı futboldan danışmaq olar?. Əgər Tovuzun "Turanı", Lənkəranın "Xəzər"i yoxdursa, hansı futboldan danışa bilərsiniz? Oyunun keyfiyyəti öklənin balaca olması ilə ölçülmür. O zaman Çin gərək hər il dünya çempionu olsun".
Millini idarə edən xarici mütəxəssislərdən də danışan millət vəkili yerli mütəxəssilərin millliyə cəlb edilməsinin vacibliyini bir daha qeyd edib: "De Byazini mətbuat konfransında da bildirdi ki getmək fikri yoxdur. Bizə Azərbaycan xalqını tanıyan, yerli futbolu bilən adam lazımdı. O mütəxəssis də Azərbaycanda var - Arif Əsədov, Rəşad Sadıqov, Yunis Hüseynov kimi futbol məşqçiləri var. Qurban Qurbanovun adını çəkmirəm, tərəfkeşlik edir deyərlər. Ancaq yuxarıda sadaladığım mütəxəssislər var ki, onların milliyə gətiriməsi vacib şərtlərdəndir".
Günel Hüseynli
