Xəbər verdiyimiz kimi, avqustu 25-də tanınmış videobloqer Nail Kəmərlinin avtomobilindən oğurluq edilib.
Bu barədə bloqer öz sosial şəbəkə hesabında məlumat yayaraq bildirmişdi ki, gecə saatlarında yaşadığı ərazidə park etdiyi "Niva” markalı avtomobilə naməlum şəxs və ya şəxslər hücum edib. O, qeyd edib ki, açar seçmə yolu ilə maşının qapısını açaraq oradan çəkilişlərdə istifadə edilən fotoaparat oğurlanıb. Həmçinin avtomobilin maqnitafonu da sındırılaraq yararsız hala salınıb.
Məsələyə DİN-in Mətbuat xidmətindən də münasibət bildirilərək qeyd edilib ki, baş vermiş hadisə barədə polisə məlumat daxil olub və araşdırılır.
Məsələ ilə bağlı AZXEBER.COM-a danışan videobloqer Nail Kəmərli bildirib ki, avtomobilinə hücum edənlər tapılmayıb:
"Hazırda araşdırma aparılır. Hələ yeni məlumat yoxdur. Hadisəni törədənlərin tapılması istiqamətində işlər görülür. Ümid edirik, tapılacaq. Yeni məlumat olduqda özüm də sosial şəbəkə hesabımda yayımlayacağam”.
Onu da qeyd edək ki, videobloqer bir müddətdir ki, narkomanlarla bağlı videolar çəkir. Nail Kəmərli bu hadisənin narkomaniya ilə bağlı çəkdiyi videolarla əlaqədar olduğunu bildirmişdi.
Aydın Nuri
