Sosial şəbəkələrdə boşandıqdan sonra aliment ala bilmədiyini bildirən qadının paylaşdığı video müzakirələrə səbəb olub.
O, keçmiş həyat yoldaşından aliment ala bilmədiyini, uşağının xərclərini tək qarşıladığını və bu vəziyyətin onun üçün ciddi maddi çətinliklər yaratdığını deyib.
Qadının yaşadığı problem boşanmadan sonra aliment öhdəliyinin icrası məsələsini də yenidən gündəmə gətirib. Bəs məhkəmə aliment ödənilməsi barədə qərar verdikdən sonra həmin vəsaitin tutulması niyə bəzən problemə çevrilir?
Mövzu ilə bağlı hüquqşünas Ramil Süleymanov AZXEBER.COM-a açıqlamasında bildirib ki, məhkəmə qətnaməsinin icrası məcburidir:
"Məhkəmə qətnaməsi dövlətin adına çıxarılmış bir sənəddir və onun icrası vətəndaş tərəfindən mütləq və məcburidir. Əgər hər hansı şəkildə alimentin ödənilməsindən imtina olunursa, bununla bağlı icra məmuru tərəfindən ilk növbədə şəxsin gəlirləri və əmlak vəziyyəti yoxlanılır. Bundan sonra şəxsin barəsində Azərbaycan Respublikasının İnzibati Xətalar Məcəlləsinin 528-ci maddəsinə əsasən protokol tərtib olunaraq məhkəməyə göndərilir. Məhkəmə həmin şəxsə inzibati qaydada cərimə tətbiq edə və ya 1 ayadək müddətə inzibati həbs verə bilər. Əgər şəxs 1 il ərzində eyni xətanı təkrar törədirsə, bu zaman 528.2-ci maddəyə əsasən onun barəsində 2 ayadək inzibati həbs tətbiq oluna bilər”.
Hüquqşünas qeyd edib ki, şəxs məhkəmə qərarını qərəzli şəkildə icra etməkdən yayınmağa davam edərsə, məsələ cinayət məsuliyyətinə də səbəb ola bilər:
"Əgər şəxs bununla da məhkəmə qərarını icra etməkdən qərəzli şəkildə yayınırsa, artıq bununla bağlı Azərbaycan Respublikasının Cinayət Məcəlləsinin 306-cı maddəsinə uyğun olaraq cinayət işi başlanılır. Şəxsin barəsində istintaq aparılır və yekunda məhkəmə qərarı qəbul edilir”.
Fəridə Əsədzadə
