"Oleq Bakınski" kimi tanınan Oleq Krapivin və onunla birgə ittiham olunan Konstantin Kuçerin cinayət işi üzrə növbəti məhkəmə prosesi keçirilib.
AZXEBER.COM xəbər verir ki, Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən iclasda Oleq Krapivin sərbəst şəkildə iştirak edib.
Prosesin ilkin mərhələsində zərərçəkmişlə təqsirləndirilən şəxslər arasında hər hansı razılaşmanın olub-olmaması müzakirə olunub. Müdafiəçilər bu məsələyə münasibət bildirərək, zərərçəkmişlərlə barışıq əldə olunması üçün hər hansı addım atmadıqlarını qeyd ediblər.
Bundan əlavə, vəkillər istintaq zamanı bəzi prosessual pozuntuların baş verdiyini əsas gətirərək, bu halların araşdırılması məqsədilə müvafiq ekspertizaların təyin olunması barədə şifahi vəsatətlə çıxış ediblər. Prokuror isə bu vəsatəti məhkəmə istintaqının yekunlaşma mərhələsində olmasını əsas gətirərək, əsassız hesab edib.
Xatırladaq ki, Oleq Krapivin Azərbaycan Respublikası Cinayət Məcəlləsinin 221.3-cü (xuliqanlıq - silah qismində istifadə edilən əşyalardan istifadə edilməklə törədildikdə) və 127.2.3-cü (qəsdən sağlamlığa az ağır zərər vurma) maddələri ilə, Konstantin Kuçer isə 178.4-cü (dələduzluq - xüsusilə külli miqdarda ziyan vurmaqla törədildikdə) və 221.3-cü maddələri ilə ittiham olunur.
Cinayət işi üzrə Rusiya vətəndaşı Zaxarenkov Valeriy Nikolayeviç, "Aviazapçast" ASC və "Promışlennıye Postavki Kazaxstan" MMC zərərçəkmiş qismində tanınıblar.
Qeyd edək ki, "Oleq Bakınski" Daxili İşlər Nazirliyinin Mütəşəkkil Cinayətkarlığa Qarşı Baş İdarəsi tərəfindən Bakıda saxlanılıb. Ötən prosesdə təqsirləndirilən Oleq Krapivinin səhhəti ilə bağlı vəkilinin vəsatəti əsasında məhkəmə onun barəsində seçilmiş həbs qətimkan tədbirini ev dustaqlığı ilə əvəz edib.
