Son illər saç tökülməsi bir çox insanı narahat edən problemlərdən biridir.
Xüsusilə payız aylarında bəzi insanlarda saç tökülməsinin artdığı müşahidə olunur. Mövsüm dəyişikliyi, günəş şüalarının təsiri və orqanizmdə baş verən dəyişikliklər saçların sağlamlığına təsir göstərə bilər.
Lakin saç tökülməsinin uzun müddət davam etməsi və ya normadan artıq olması müəyyən sağlamlıq problemlərinin əlaməti də ola bilər. Belə hallarda saç tökülməsinin səbəbini müəyyənləşdirmək və müvafiq tədbirlər görmək vacibdir.
Mövzu ilə bağlı AZXEBER.COM-a danışan trixoloq Cəmilə Əsgərova bildirib ki, mövsüm dəyişikliyi saç tökülməsinə təsir göstərə bilər. Onun sözlərinə görə, xüsusilə payız və yaz aylarında saç tökülməsinin sürətlənməsi müşahidə olunur:
"Payız mövsümündə yaydan sonra yaranan tökülmə baş verə bilər. Belə ki, yay aylarında istilik və günəş şüalarının təsiri ilə saçlar böyümə fazasında, yəni anagen fazada olur. Payız gəldikdə isə saçlar telogen fazaya keçərək tökülə bilər. Bu səbəbdən mövsümi saç tökülməsi müşahidə oluna bilər. Həmçinin dəniz suyu və günəş şüaları saçların zədələnməsinə səbəb olur ki, bu da saç tökülməsinə təsir göstərə bilər.
Yaz aylarında isə qış mövsümündə yaranan D vitamini çatışmazlığı və digər səbəblərdən saç tökülməsi baş verə bilər”.
Trixoloq qeyd edib ki, saç tökülməsi yalnız mövsüm dəyişikliyi ilə əlaqəli olmaya bilər. Belə hallarda problemin səbəbini müəyyənləşdirmək üçün qan analizlərinin yoxlanılması vacibdir:
"Lakin saç tökülməsi bütün mövsümlərdə, mövsümdən asılı olmayaraq müşahidə edilirsə, mütləq qan analizləri yoxlanılmalıdır. Ümumi qan analizi, dəmir, ferritin, B12 vitamini və qalxanabənzər vəz hormonlarının göstəriciləri ən vacib müayinələrdəndir.
Bu göstəricilərdə dəyişiklik varsa, mütləq müalicə aparılmalı, qan analizlərində müəyyən edilən çatışmazlıqlar aradan qaldırılmalıdır. Yerli olaraq isə qan dövranını yaxşılaşdıran saç müalicələri tətbiq edilə bilər”.
Fəridə Əsədzadə
