“Prezidentə çox əsəbləşmişdim, hətta danışa bilmirdim...

Mixail Saakaşvili Cənubi Osetiyadakı müharibəyə başlamaq üçün Rusiyanın təxribatına yol açıb. Gürcüstan mətbuatının yazdığına görə, belə bir bəyanatla ABŞ-ın sabiq dövlət katibi Kondoliza Rays çıxış edib. "No Higher Honor: A Memoir of My Years in Washington” adlı kitabında rus-gürcü müharibəsi haqda xatirələrini bölüşən amerikalı diplomat deyib ki, 2008-ci ilin yayından o bir tərəfdən impulsiv Saakaşvilini, digər tərəfdən isə ABŞ administrasiyasının emosional əməkdaşlarını sakitləşdirməyə çalışırdı. “Saakaşvili məğrur və emosional adamdır, biz hamımız qorxurduq ki, o, Moskvaya müharibəyə başlamaq üçün fürsət yarada bilər. Dəfələrlə ona demişəm ki, gücün tətbiq olunmaması haqda sazişi imzalasın. Lakin Saakşavili bu təkliflərimi rədd edirdi. Bir dəfə dedim ki, cənab prezident nə istəyirsiz edin, amma Rusiyanın sizi təxribata çəkməyinə imkan verməyin. Yadınıza salın ki, prezident Corc Buş sizə demişdi ki, Moskva sizi hansısa səhv addıma təhrik edir. Rusiyanın hərbi gücü ilə qarşıdurmaya meyl etməyin, heç kim sizin imdadınıza çatmayacaq və siz uduzacaqsız”, - deyə o vurğulayıb. Rays həmçinin münaqişə zamanı Tiflisə etdiyi səfəri barədə yazıb. İnadkar, emosional və yorğun Saakaşviliyə görə narahat olduğunu deyən ABŞ-ın sabiq dövlət katibi Gürcüstan prezidentindən mətbuat konfransında avropalılara və amerikalılara təşəkkür etməyi xahiş edib. Lakin bunun əvəzində Saakaşvili rusları vəhşi adlandıraraq, tankları geri çəkməyə çağırıb: “Saakaşviliyə çox əsəbləşmişdim, hətta danışa bilmirdim. Bir müddət sonra Brüsseldə NATO XİN başçılarının toplantısı keçirildi. Bəzilərin Saakaşvilinin hərəkətlərinə müsbət yanaşdığını gördüm və bu, məni təəcübləndirdi. Lakin sonra bir neçə nazir dedi ki, Saakaşvili öz addımları ilə göstərdi ki, Gürcüstana NATO-ya üzvlüklə bağlı fəaliyyət planı (MAP) niyə təqdim olunmadı”.