Bu gün Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarov, 1-ci idarəsinin sabiq rəisi Səlim Məmmədov, 2-ci idarənin sabiq rəisi Akif Əliyev və 3-cü idarənin 1-ci şöbəsinin sabiq rəis müavini Orxan Osmanovun cinayət işi üzrə məhkəmənin baxış iclası davam edib.
Bakı Hərbi Məhkəməsinin sədri Həbib Həsənovun sədrliyi ilə keçirilən iclas Sabunçu rayon Məhkəməsinin binasında baş tutub. Proses haqqında vəkil Cavid Rzazadə məlumat verib.
Vəkil bildirib ki, prosesdə ayrı-ayrı epizodlar üzrə iki şahid dindirilib.
İlk olaraq zərərçəkən Zakir Bədəlovun epizodu üzrə şahid dindilib.
Xatırladaq ki, Zakir Bədəlov qohumu Zakir Mustafayevdən faizə 100 min dollar pul alıb. O, istintaqa deyib ki, aldığı pulu 125 min dollar olaraq geri qaytarıb. Onun sözlərinə görə, qohumu Zakir Mustafayev onu MTN vasitəsi ilə hədələyərək əlavə 150 min, daha sonra isə 200 min tələb edib. Bundan sonra MTN-ə aparılaraq ona hədə-qorxu gəlinib. Onun sənədləri əlindən alınıb. Xarici vətəndaş olduğundan Miqrasiya Xidmətinə veriləcəyi ilə hədələnib.
Epizod üz şahid qismində Zakir Bədəlovun qızı Tamella Bədəlova ifadə verib.
O, ifadəsində atasının Akif Çovdarov tərəfindən MTN-ə aparıldığını və ona hədə-qorxu gəlindiyini bildirib. Şahid atası ilə eyni məzmunlu ifadələr verib.
Vəkillər şahiddən atasının MTN-ə aparıldığına, danışdıqlarına şahid olub-olmadığını soruşublar.
Şahid Tamella Bədəlova isə bildirib ki, bunların hamısını atası və anasından eşidib.
Peosesdə zərərçəkmiş Neyman Kərimovun epizodu üzrə şahid dindirilib.
Xatırladaq ki, Neyman Kərimov Sevinc Məmmədovanın şikayəti əsasında MTN-ə gətirilib. O, şikayətində Neyman Kərimovun ona 30 min manat pul "atdığını” deyib. Bundan sonra Neyman Kərimov MTN-də gətirilib. Ondan 250 min manat pul tələb olunub. Təzyiqlərdən sonra razılaşma olub. Neyman Kərimov 80 min manat pul verib. Həmin pulu MTN-ə Neyman Kərimovun dayısı Zakir Mövsümov gətirib.
Həmin epizod üzrə şahid qismində məhkəmədə Sevinc Rüstəmova dindirilib.
O, ifadəsində Neyman Kərimovun danışdıqlarının çoxunun yalan olduğunu deyib.
S. Məmmədova qeyd edib ki, 30 min pulu Neyman ondan borc alıb: "Neyman həmin pulun 10 minini Binəqədinin prokororu Mirəlkəbər Seyidovun oğlunun adına aldı. Bir müddət keçdi, pulu vermədilər. Mən də məcbur oldum Mirələkbər müəllimə zəng edib dedim ki, oğlunun mənə borcu var. Prokuror məni və Neymanı yanına çağırdı. Mirələkbər müəllim Neymandan soruşdu ki, 10 mini oğluna veribmi? O da təsdiqlədi. Mirələkbər müəllim 10 min pulu verdi. Qalan pulu da Neyman verəcəkdi. O, vermədi. Mən də tanışımla MTN-ə şikayət etdim. Pulumu Neymandan alıb verdilər".
Şahid həmçinin Neyman Kərimovun dayısı Zakir Mövsümovun MTN-ə gəlməsi haqqında da məlumat verib. O bildirib ki, Zakir Mövsumov MTN-də Neymanı danlayıb: "Hətta dedi ki, Neyman onun bacısının ölməsinin səbəbkarıdır. O, bacısının Neymanın borclarına dözə bilməyib özünü asdığını dedi.
Proses günün ikinci yarısı davam edəcək.
Qeyd edək ki, təqsirləndirilənk şəxslər - Akif Çovdarova Cinayət Məcəlləsinin 145.3 (Qanunsuz azadlıqdan məhrumetmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israfetmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədilə törədildikdə), 182.3.1, 182.3.2 (Hədə-qorxu ilə tələbetmə külli miqdarda əmlak əldə etmək məqsədilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri, Səlim Məmmədova həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.1, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri, Akif Əliyevə həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri və Orxan Osmanova isə həmin Məcəllənin 145.3, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 341.2.1, 341.2.2 və 341.2.3-cü maddələri ilə yekun ittihamlar irəli sürülüb.
Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər Akif Çovdarov, Səlim Məmmədrov, Akif Əliyev və Orxan Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.
///Lent.az
