Putin tanınmış qadın jurnalisti həbs etdirdi - FOTO

Rusiyanın paytaxtı Moskvada müxalifətin martın 6-da başlamış etiraz aksiyaları davam edir. Moskvanın mərkəzində Çistıe Prudı bulvarında əllərində ağ lentlər olan 100-dək müxalifət tərəfdarı qalmaqdadır. Dörd gün davam edən bayram tətilindən sonra ilk iş günü olduğundan, bu gün etirazçıların sayı əhəmiyyətli dərəcədə azalıb. Onların əksəriyyəti gecəni də bulvarda keçirib. Onlar burada futbol və voleybol oynayıb, gitarada ifa ediblər. Etirazçılar ötən gecə lidersiz qalıblar. Onlara başçılıq edən teleaparıcı Kseniya Sobçak və müxalifətçi İlya Yaşin aksiyanın keçirildiyi yeri gecəyarısı tərk ediblər. Ötən gecə polis hökumət əleyhinə keçirilən aksiyaları dağıtmağa cəhd göstərməyib. Yalnız donuz kostyumu geyinmiş 8 qız saxlanılıb. Onlar təxribat törətməyə çalışıblar.