"Təmiz Dünya” Qadınlara Yardım İctimai Birliyi növbəti tədbirini keçirib
Bu gün Azərbaycan Media Mərkəzində “Təmiz Dünya” Qadınlara Yardım İctimai Birliyi “Qadınlara qarşı zorakılığa yox” adlı tədbir keçirdi. AZXEBER.COM-un məlumatına görə, tədbirin keçirilməsində məqsəd “Təmiz Dünya” Birliyinin bütün dünyada keçirilən 16 günlük aksiyaya qoşulmasıdır. Tədbirdə ailədə zorakılığa məruz qalmış, ailə zorakılığı zəminində öldürülən bir qism qadınların adları ağ vərəqlərdən ibarət lövhələrdə masanın üzərinə düzülmüşdü. Bundan başqa tədbir təşkilaçıları sülh rəmzi olaraq sinələrinə ağ lent asmışdılar. Tədbirdə çıxış edən “Təmiz Dünya” Qadınlara Yardım İctimai Birliyinin sədri Mehriban Zeynalova ilk olaraq tədbir haqda danışdı. Daha sonra o, ictimai birliyin 16 günlük aksiyaya qoşulması, bu aksiyanın əhəmiyyəti haqda məlumat verdi. Qeyd edək ki, zorakılıq dünyanın inkişaf etmiş və inkişaf etməkdə olan ölkələrində geri qalmış ölkələrə nisbətən azdır. Zorakılıqla mübarizədə ən böyük problem zorakılığın aşkarlanmasıdır. Qadınlar adətən utandıqları üçün zorakılığa məruz qaldıqlarını gizlədirlər. 16 günlük aksiyanın qadınlara qarşı hər cür zorakılığa reaksiyanı artırmaq yönündə böyük əhəmiyyət daşıyır. 16 günlük aksiya özündə 16 addımı birləşdirir. Bunlar arasında beynəlxalq və regional razılaşmaları təsdiqləmək, qanunlar qəbul etmək və onların tətbiqini təmin etmək, milli və yerli Fəaliyyət planlarının hazırlanması, müharibə gedən ölkələrdə, iş yerlərində qadınların zorakılığa məruz qalması, seçki zamanı qadınların hüquqlarının pozulması, qadınların odlu silahla öldürülməsi və s. məsələlər var. Qeyd edək ki, Təmiz Dünya” Qadınlara Yardım İctimai Birliyi “Qadınlara qarşı zorakılığa yox” aksiyası altında noyabrın 25-də Bakının ən sıx küçələrində paytaxt sakinlərinə ağ çiçəklər paylayıb.
