Tələbələr "əla" və "yaxşı" qiymət almaları üçün 1-2 balın çatmadığını bildiriblər. Rektor isə apellyasiya şikayəti verən hər tələbəni dinləyərək müraciətlərinə uyğun olaraq işlərinin yenidən yoxlanılması tapşırığını verib. A. Məhərrəmov imtahan işlərini obyektiv yoxlamayan, tələbələrin qiymətlərini azaldan müəllimlərin aqibətinin çox ağır olacağını xüsusi vurğulayıb.
Təəssüf ki, digər ali məktəblərdə tələbələrin narazılıqlarının dinlənilməsi hallarına rast gəlinməyib. Bu, bir yana, hətta Qərb Universitetində Təhsil Nazirliyinin "qaynar xətt"inə müraciət etmiş bir qrup tələbə ali məktəbdən qovulmaq təhlükəsi ilə üz-üzə qalıb. Bunu "Şərq"ə Tələbələrin Beynəlxalq Əməkdaşlığı İctimai Birliyinin sədri Elnur Məmmədli bildirdi. E.Məmmədli imtahan sessiyaları zamanı monitorinqlər aparmalarına Təhsil Nazirliyinin icazə vermədiyini dedi:
- Əvvəllər biz imtahan sessiyaları zamanı monitorinqlər aparırdıq. İmtahanlarda birbaşa iştirak edirdik və qiymətləndirmənin obyektiv aparılıb-aparılmadığını müşahidə edirdik. Sonra isə Təhsil Nazirliyi buna qadağa qoydu, bizə icazə vermədilər artıq. İmtahan sessiyaları ilə bağlı hazırladığımız hesabatda mənfi çalarlar çox olduğundan, görünür bu, Təhsil Nazirliyinin xoşuna gəlməmişdi və nəticədə biz monitorinqlərdən kənarlaşdırıldıq. İndi biz imtahanları ancaq kənardan izləyə bilirik. Tələbələr arasında sorğu keçirməklə vəziyyəti müəyyənləşdiririk. Düzdür, bu üsul 100 faiz nəticənin əldə edilməsinə imkan yaratmır, ancaq vəziyyət 90 faiz aydınlaşır. Qiyabi şöbədə imtahanlar hələ başa çatmadığından biz araşdırmanı yekunlaşdırmamışıq. Ona görə də yekun hesabatımız hələ hazır deyil. Ancaq bəri başdan onu deyə bilərəm ki, imtahanlarda rüşvət halları, tələbələrin sıxışdırılması ilə bağlı məlumatlarımız var. Narazılıqlar əsasən dövlət ali məktəblərindəndir. Bunlar hamısı yekun hesabatda əksini tapacaq. Araşdırma zamanı bunu da müəyyənləşdirdik ki, tələbələr Təhsil Nazirliyinin "qaynar xətt"inə etibar etmir. Əlimizdə məlumatlar var ki, Qərb Universitetinin tələbəsi təhsil haqları ilə bağlı Təhsil Nazirliyinin "qaynar xətt"inə müraciət edib, neqativ faktları açıqlayıb, amma indi bir qrup tələbə qovulma təhlükəsi ilə üz-üzədir. Bunun da səbəbi odur ki, "qaynar xət"lərdə anonimlik qorunmur. Tələbələr bildirir ki, anonim zəng edəndə şikayəti qeydə almırlar. Zəng edənin özünü təqdim etməsini tələb edirlər. Bu da nəticəsi. Hazırda biz bu məsələni araşdırırıq və Təhsil Nazirliyinə, Qərb Universitetinə rəsmi şəkildə sorğu ilə müraciət edəcəyik. Həmin tələbələrin hüquqlarının qorunmasına çalışacağıq.
//Şərq qəzeti
