Liviyanın Zintan şəhərinin sakinləri Seyf əl-İslam Qəddafinin həbs edilməsi ilə əlaqədar bayram əhval-ruhiyyəsindədir. Devrilmiş lider Müəmmər Qəddafinin ikinci oğlu dünən ölkənin cənubundakı Ubari ərazisində Nigerə qaçmağa çalışarkən ələ keçirilib.Seyf əl-İslamın Tripoliyə aparılaraq müvəqqəti hökumətə təhvil veriləcəyi, yoxsa Niderlanda aparılaraq Beynəlxalq Cinayət Məhkəməsində mühakimə ediləcəyi hələ sual altındadır. Liviyalılar bəşəriyyətə qarşı cinayətlərdə ittiham olunan Seyf əl-İslam Qəddafinin elə Liviyada da mühakimə olunmasını istəyirlər. Zintan hərbi şurasının başçısı polkovnik Məhəmməd əl-Xabaş bildirib ki, Seyf əl-İslam Qəddafi Liviyada məhkəmə sistemi qurulanadək Zintan şəhərində saxlanılacaq.Kütləvi-informasiya vasitələrində isə 39 yaşlı Seyf əl-İslamın ələ keçirilərkən çəkilmiş şəkli geniş yayılır. Şəkildə onun əlinin 3 barmağının sarıqlı olduğu görünür. Qəddafini ələ keçirən üsyançı qrupun mətbuat nümayəndəsi Usama Cüvaid Seyf əl-İslamın barmaqlarından çoxdan, NATO aviazərbəsi nəticəsində yaralandığını, hazırda isə vəziyyətinin yaxşı olduğunu bildirib. Hazırda Liviyada vətəndaş müharibəsi zamanı törədilən cinayətlərə görə Beynəlxalq Cinayət Məhkəməsinin axtarışında bircə sabiq kəşfiyyat rəhbəri Abdulla əl-Sənussi qalır. İndii liviyalıların da diqqət mərkəzi yaxın bir neçə gün ərzində formalaşdırılması gözlənilən yeni hökumətə yönəlib.
