Millət vəkili Qənirə Paşayeva Ərdoğan Saraçla Qarabağ həqiqətlərinin Makedoniyada daha geniş yayılmasını müzakirə edib
AZXEBER.COM-un məlumatına görə, millət vəkili Qənirə Paşayeva Makedoniya Türk Milli Birlik Hərəkatı Partiyasının sədri, millət vəkili Ərdoğan Saraç ilə görüşüb
Azərbaycan ilə Makedoniya arasında münasibətlərin bütün sahələrdə daha da genişləndiyini qeyd edən millət vəkili Qənirə Paşayeva ikitərəfli əlaqələrin inkişafında qanunverici orqanların rolunu xüsusi vurğuladı.
Millət vəkili Qənirə Paşayeva Azərbaycanın Makedoniya ilə münasibətlərin inkişafına önəm verdiyini, bütün istiqamətlərdə əməkdaşlığın genişlənməsində maraqlı olduqlarını deyib.
Ermənistanın işğal etdiyi Azərbaycan torpaqlarında törətdiyi vandalizm aktları, minlərlə azərbaycanlını qətlə yetirməsi, soyqırım törətməsi, Xocalı, Qaradağlı, Bağanıs-Ayrım soyqırımlarının Makedoniya cəmiyyətində daha da geniş yayılmasına böyük ehtiyac olduğunu deyən millət vəkili Qənirə Paşayeva bu istiqamətdə Türk Milli Birlik Hərəkatı Partiyasının gördüyü işlərə görə Ərdoğan Saraça təşəkkür edib və bildirib ki, Makedoniyadakı türk qardaşlarımızın və onları təmsil edən təşkilatların bu istiqamətdə aktivliyinin artması böyük önəm daşıyır.
O deyib ki, dünyanın harasında yaşamasından asılı olmayaraq bütün türklər Ermənistanın törətdiyi bu kimi vandalizm aktlarını, erməni yalanlarını və Azərbaycan həqiqətlərini yaşadıqları ölkələrin ictimaiyyətinə və beynəlxalq ictimaiyyətə daha geniş çatdırılması üçün səylərini daha da artırmalıdırlar. Millət vəkili Azərbaycan həqiqətlərinin Makedoniya ictimaiyyətinə daha geniş çatdırılması istiqamətində Türk Milli Birlik Hərəkatı Partiyasının öz səylərini bundan sonra da daha da artıracağına inandığını da deyib. Qənirə Paşayeva Makedoniya millət vəkili Ərdoğan Saraça Azərbaycan həqiqətlərinə dair materiallar, kitablar və sənədli filmlər də təqdim edib və onu Azərbaycana dəvət edib.
“Azərbaycanın dərdi bizim dərdimizdir”, - deyən Ərdoğan Saraç Ermənistanın işğal etdiyi Azərbaycan torpaqlarında törətdiyi vandalizm aktlarının və soyqırımların Makedoniya ictimaiyyətinin diqqətinə çatdırılması istiqamətində gördükləri işlərdən danışıb və bu istiqamətdə fəaliyyəti bundan sonra daha da sürətləndirəcəklərini bildirib. O deyib ki, bir millət vəkili kimi o da bu məsələni daim gündəmdə saxlayır və saxlayacaq. O, böyük məmnuniyyətlə Azərbaycana səfər etmək istədiyini və həm ölkələri, həm də Azərbaycan türkləri ilə Makedoniya türkləri arasında əlaqələrin və əməkdaşlığın daha da genişləndirilməsi istiqamətində böyük imkanları nəzərə alaraq ikitərəfli səylərin daha da artırılmasının vacibliyini vurğulayıb. Ərdoğan Saraç Azərbaycanla bütün istiqamətlərdə əməkdaşlığın genişləndirilməsi, eyni zamanda Azərbaycan həqiqətlərinin yayılması istiqamətində öz səylərini bundan sonra daha da artıracaqlarını bildirib.
