Bakının Hövsan qəsəbəsində qətl törətməkdə təqsirləndirilən Emil Hüseynovun cinayət işi üzrə məhkəmə istintaqı başlayıb.
AZXEBER.COM Oxu.Az-a istinadən xəbər verir ki, Bakı Ağır Cinayətlər Məhkəməsinin hakimi Nigar İmanovanın sədrliyi ilə keçirilən prosesdə prokuror ittiham aktını elan edib.
Təqsirləndirilən Emil Hüseynov ittiham üzrə özünü qismən təqsirli bilib.
Daha sonra E.Hüseynovun sərbəst ifadəsi dinlənilib. O, ifadəsində hadisəni oğluna görə törətdiyini bildirib:
"Rasimi 2023-cü ildən tanıyırdım, məhləmizdə yaşayırdı. Kimliyi barədə heç nə bilmirdik. Oğlum bir gün dedi ki, belə bir adam var, insanlara yaxşılıq edir. Əvvəl Rasimlə normal münasibətimiz var idi. Sonradan onda qəribə davranışlar müşahidə etməyə başladım: üz-gözü daim yara içində olurdu, qəribə döymələr etdirirdi. Daha sonra öyrəndim ki, oğurluq üstündə dəfələrlə məhkum olunub və Rasimlə bağlı söz-söhbətlər getdikcə artmağa başladı.
14 yaşlı oğlum Məhəmmədin də davranışları dəyişmişdi. Evdə tapılmır, çox gec saatlarda qayıdırdı. Bir dəfə gəlib dedi ki, artıq Rasimlə qalacaq. Təxminən bir il yarımdır ki, Məhəmmədi harada axtarsaydım, Rasimin evində tapırdım. Demək olar ki, orada yaşayırdı. O, uşağımı namaz öyrətmək adı ilə aparmışdı.
Bir dəfə Məhəmməd evə gəlib anasından pul istədi. İstədiyi məbləği verə bilmədikdə özünü döyməyə, yaralamağa başladı. Qorxudan pensiya kartımı ona verdim ki, gedib istədiyi məbləği götürsün. Sonra Rasim də gəlib pul tələb etməyə başladı. Uşaq onun təsiri ilə tamam dəyişmişdi.
İnternetdə özü yaşda uşaqların və Rasimin də iştirak etdiyi bir məclisdən video paylaşmışdı. Orada "vorovskoy" mahnılar oxuyur, qəlyan və siqaret çəkirdilər. Artıq dözümüm tükənmişdi".
Təqsirləndirilənin sözlərinə görə, bundan sonra Rasim Lariyonovla görüşərək oğlu ilə bağlı söhbət etmək istəsə də, hadisələr gözlədiyi kimi inkişaf etməyib:
"Axşamüstü Hövsandakı bağ massivində yerləşən evimin arxa tərəfində onu söhbətə çağırdım. Həmin gün bıçağım da üstümdə idi. Gördüm ki, Rasim oğlum Məhəmmədlə birlikdə gəldi. Çatan kimi lezva çıxarıb üstümə cumdu. Qorxudan cibimdəki bıçağı çıxarıb onu qarın nahiyəsindən vurdum. Qışqırıq səsinə qonşular çölə çıxdı. Həkimi özüm çağırdım. Uşağıma görə məcbur qalıb bu əməli törətmişəm".
Məhkəmə prosesinin növbəti iclası yanvarın 14-nə təyin edilib.
Qeyd edək ki, hadisə 2025-ci il avqustun 20-də Suraxanı rayonu, Hövsan qəsəbəsi ərazisində baş verib. 1995-ci il təvəllüdlü Rasim Lariyonovun öldürülməsi barədə rayon prokurorluğuna məlumat daxil olub.
İlkin araşdırmalar zamanı 1975-ci il təvəllüdlü Emil Hüseynovun aralarında yaranmış mübahisə zamanı bıçaqla xəsarətlər yetirərək Rasim Lariyonovu qəsdən öldürməsinə əsaslı şübhələr müəyyən edilib.
Faktla bağlı Suraxanı Rayon Prokurorluğunda Azərbaycan Respublikası Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Emil Hüseynov şübhəli şəxs qismində saxlanılaraq barəsində ittiham irəli sürülüb.
